ஓய்வுபெற்ற வேளாண் அதிகாரி வீட்டில் ரூ.65 ஆயிரம் திருட்டு

நெல்லை:

நெல்லையை அடுத்த ராமையன்பட்டி பகுதியை சேர்ந்தவர் கிருஷ்ணன் (வயது 72). ஓய்வுபெற்ற வேளாண் அதிகாரி. இவர் கடந்த சில நாட்களுக்கு முன்பு தனது குடும்பத்தினருடன் வெளியூர் சென்றுவிட்டார். அவருடைய மகன் சுந்தரம் தாழையூத்தில் வசித்து வருகிறார். நேற்று முன்தினம் இவர் ராமையன்பட்டியில் உள்ள வீட்டிற்கு வந்தார். அப்போது வீட்டின் ஜன்னல் கதவு உடைக்கப்பட்டு திறந்து கிடந்தது.

இதனால் அதிர்ச்சி அடைந்த சுந்தரம் வீட்டின் உள்ளே சென்று பார்த்தபோது அங்கு பீரோவில் இருந்த ரூ.65 ஆயிரம் மற்றும் 850 கிராம் வெள்ளி பொருட்களை மர்மநபர்கள் திருடி சென்றது தெரியவந்தது. இதுகுறித்து சுந்தரம் மானூர் போலீசில் புகார் அளித்தார். அதன்பேரில் போலீஸ் இன்ஸ்பெக்டர் ராமர் வழக்குப்பதிவு செய்து கொள்ளையர்களை வலைவீசி தேடி வருகிறார்.