மின்கம்பியில் உரசி கீழே விழுந்த மயில் சாவு

ஜீயபுரம்:

திருச்சி குழுமணி அருகே உள்ள பேரூரில் மயில்கள் உள்ளன. நேற்று காலை அந்த பகுதியில் குழுமணி - உறையூர் சாலையில் நின்ற ஒரு மயில் திடீரென பறந்து சென்றபோது சாலையோரம் உள்ள மின் கம்பியில் உரசியதில், மின்சாரம் பாய்ந்து மயங்கிய நிலையில் சாலையில் விழுந்தது. அந்த வழியாக சென்றவர்கள் அதைக்கண்டு கிராம நிர்வாக அலுவலருக்கு தகவல் கொடுத்தனர். அதன்பேரில் சம்பவ இடத்திற்கு கிராம நிர்வாக அலுவலர் கிருபாலெட்சுமி வந்து பார்த்தபோது இறந்துகிடந்தது தெரியவந்தது. இது பற்றி வனத்துறை அதிகாரிகளுக்கு தகவல் தெரிவிக்கப்பட்டது. அதன்பேரில் கிராம நிர்வாக அலுவலகத்திற்கு வந்த வனத்துறையினரிடம், இறந்த மயிலை கிராம நிர்வாக அலுவலர் ஒப்படைத்தார்.