கல்லூரி மாணவி உள்பட 2 பேர் தற்கொலை

குளித்தலை அருகே உள்ள பாப்பக்காபட்டி பகுதியை சேர்ந்தவர் கதிர்வேல். இவரது மகள் சந்தியா (வயது 19). இவர் கரூரில் உள்ள அரசு கலைக் கல்லூரியில் பி.ஏ. ஆங்கிலம் 3-ம் ஆண்டு படித்து வந்தார். இவருக்கு அடிக்கடி வயிற்றுவலி ஏற்பட்டு வந்துள்ளது. இந்தநிலையில் நேற்று முன்தினம் சந்தியா வீட்டில் சேலையில் தூக்குபோட்டு தொங்கினார்.

 இதைக்கண்ட பெற்றோர் அவரை மீட்டு சிகிச்சைக்காக குளித்தலை அரசு மருத்துவமனைக்கு கொண்டு சென்றனர். பின்னர் அவர் மேல் சிகிச்சைக்காக திருச்சி அரசு மருத்துவமனையில் அனுமதிக்கப்பட்டு சிகிச்சை பெற்று வந்தார். இந்தநிலையில் சிகிச்சை பலனின்றி சந்தியா பரிதாபமாக இறந்தார். இந்த சம்பவம் குறித்து குளித்தலை போலீசார் வழக்குப்பதிந்து விசாரணை நடத்தி வருகின்றனர்.

கிருஷ்ணராயபுரம் அருகே உள்ள எழுதியாம்பட்டியை சேர்ந்தவர் பழனிச்சாமி. இவரது மகள் மகேஸ்வரி. இவருக்கு திருமணமாகி கணவர் மற்றும் 10 மாத பெண் குழந்தை உள்ளது. இந்தநிலையில் கடந்த சில நாட்களுக்கு முன்பு தனது தந்தை வீடான எழுதியாம்பட்டிக்கு மகேஸ்வரி வந்துள்ளார்.     

இந்தநிலையில் சில நாட்களாக மனமுடைந்து காணப்பட்ட மகேஸ்வரி சம்பவத்தன்று மாட்டுக்கொட்டகை தீவனம் வைக்கும் அறையில் சேலையில் தூக்குப்போட்டு தற்கொலை செய்து கொண்டார். இதுகுறித்து தகவலறிந்த மாயனூர் போலீசார் சம்பவ இடத்திற்கு வந்து மகேஸ்வரியின் உடலை கைப்பற்றி பிரேத பரிசோதனைக்காக கரூர் அரசு மருத்துவக்கல்லூரி மருத்துவமனைக்கு அனுப்பி வைத்தனர். இந்த சம்பவம் குறித்து போலீசார் வழக்குப்பதிந்து விசாரணை நடத்தி வருகின்றனர்.