ஓமலூர் அருகே தர்மபுரி அரசு கலைக்கல்லூரி மாணவர் பலி-மோட்டார் சைக்கிள் மீது பால் வேன் மோதியது

ஓமலூர்:

ஓமலூர் அடுத்த கோட்ட கவுண்டம்பட்டி பகுதியை சேர்ந்தவர் லட்சுமணன். இவருடைய மகன் புத்த வளவன் (வயது 20). இவர் தர்மபுரி அரசு கலைக்கல்லூரியில் இரண்டாம் ஆண்டு படித்து வந்தார். இவர் நேற்று காலை ஓமலூர் சென்றுவிட்டு திரும்பி கோட்ட கவுண்டம்பட்டிக்கு மோட்டார் சைக்கிளில் சென்றுள்ளார்.  நாராணம்பாளையம் பிரிவு அருகே செல்லும்போது முன்னால் சென்ற மோட்டார் சைக்கிள் மீது மோதுவது போல்  சென்றதால் புத்த வளவன் திடீரென தனது வண்டியில் பிரேக் பிடித்துள்ளார். அப்போது தர்மபுரி பகுதியில் இருந்து சேலத்தை நோக்கி வந்த பால் வேன் புத்த வளவனின் மோட்டார் சைக்கிள் மீது எதிர்பாராதவிதமாக மோதியது. இதில் தூக்கி வீசப்பட்ட புத்த வளவன் படுகாயம் அடைந்தார். உடனே அவர் சிகிச்சைக்காக சேலம் அரசு ஆஸ்பத்திரிக்கு கொண்டு செல்லப்பட்டார். அங்கு அவர் சிகிச்சை பலனின்றி இறந்தார். இந்த விபத்து குறித்து ஓமலூர் போலீசார் வழக்குப்பதிவு செய்து விசாரணை நடத்தி வருகின்றனர்.