எல்லை தாண்டி மீன்பிடித்த இலங்கை மீனவர்கள் 6 பேர் கைது இந்திய கடற்படையினர் அதிரடி

காரைக்கால்

நாகை அருகே எல்லை தாண்டி மீன் பிடித்த இலங்கை    மீனவர்கள் 6 பேரை இந்திய கடற்படையினர் கைது செய்தனர்.

நாகை மாவட்டம் கோடியக்கரை கடல் பகுதியில் இந்திய கடற்படையினர் நேற்று முன்தினம் கப்பலில் ரோந்து சென்றனர். அப்போது கோடியக்கரைக்கு அருகே வெள்ளபள்ளம்- நாலுவேதபதிக்கு இடையே இலங்கையை சேர்ந்த ஒரு விசைப்படகு நிற்பது கடற்படையினருக்கு தெரியவந்தது.

உடனே அவர்கள் ரோந்து கப்பலில் சென்று அந்த விசைப்படகை பார்த்தபோது அதில் இலங்கையை சேர்ந்த 6 மீனவர்கள் இருந்தனர். அவர்களிடம் விசாரணை நடத்தியதில், எல்லை தாண்டி இந்திய கடல் பகுதியில் மீன்பிடித்தது தெரியவந்தது.

இதையடுத்து மீனவர்கள் 6 பேரையும், இந்திய கடற்படையினர் கைது செய்தனர். அவர்கள் பயன்படுத்திய விசைப் படகையும் பறிமுதல் செய்து காரைக்கால் தனியார் துறைமுகத்தில் உள்ள நாகை கடலோர பாதுகாப்பு குழும போலீசாரிடம் ஒப்படைத்தனர். 

தொடர்ந்து நடத்திய விசாரணையில், கைதான மீனவர்கள் இலங்கை திரிகோணமலையை சேர்ந்த மதுஷா, அமிலா மசங்கா, சுஜித் பண்டாரா, புதிகா, உஷன் மதுசன், துங்கா மகேலா ஆகியோர் என்பதும், அனுரா என்பவருக்கு சொந்தமான விசைப்படகில் கடந்த 21-ந் தேதி திரிகோணமலையில் இருந்து மீன்பிடிக்க வந்தபோது, காற்றின் வேகத்தில் எல்லை தாண்டி இந்திய கடல் பகுதிக்கு வந்ததும் தெரியவந்தது. 

இதையடுத்து, இலங்கை மீனவர்கள் 6 பேர் மீதும் கடலோர பாதுகாப்பு குழும போலீசார் வழக்குப்பதிவு செய்து விசாரணை நடத்தி வருகின்றனர்.