தூத்துக்குடி மாவட்டத்தில் 20,370 மாணவ, மாணவிகள் பிளஸ் 2 தேர்வு எழுதுகின்றனர்

தூத்துக்குடி மாவட்டத்தில் 85 தேர்வு மையங்களில் பிளஸ்-2 பொதுத் தேர்வு வியாழக்கிழமை தொடங்குகிறது. 20 ஆயிரத்து 370 மாணவ, மாணவிகள் தேர்வு எழுதுகின்றனர்.

தமிழகத்தில் கடந்த 2 ஆண்டுகளாக கொரோனா தொற்று பரவல் காரணமாக பள்ளி மாணவர்களுக்கான பிளஸ்-2 மற்றும் எஸ்.எஸ்.எல்.சி. அரசு பொதுத் தேர்வு நடத்தப்படவில்லை. இதனால் முந்தைய தேர்வுகளின் அடிப்படையில் மதிப்பெண்கள் வழங்கப்பட்டன. இந்த ஆண்டு பொதுத் தேர்வுக்கான கால அட்டவணை அறிவிக்கப்பட்டு உள்ளது. 

அதன்படி பிளஸ்-2 பொதுத் தேர்வு இன்று (வியாழக்கிழமை), எஸ்.எஸ்.எல்.சி. தேர்வு நாளை (வெள்ளிக்கிழமை), பிளஸ்-1 தேர்வு 9-ந் தேதியும் தொடங்குகிறது. இதனை முன்னிட்டு பொதுத் தேர்வை எழுதுவதற்கு மாணவர்கள் தயாராகி உள்ளனர்.

தூத்துக்குடி மாவட்டத்தில் பிளஸ்-2 தேர்வை கோவில்பட்டி கல்வி மாவட்டத்தில் 5 ஆயிரத்து 842 பேரும், தூத்துக்குடி கல்வி மாவட்டத்தில் 9 ஆயிரத்து 462 பேரும், திருச்செந்தூர் கல்வி மாவட்டத்தில் 5 ஆயிரத்து 66 பேரும் ஆக மொத்தம் 20 ஆயிரத்து 370 பேர் எழுதுகின்றனர். இவர்கள் தேர்வு எழுதுவதற்கு வசதியாக மாவட்டம் முழுவதும் 85 தேர்வு மையங்கள் அமைக்கப்பட்டு உள்ளன. தேர்வு மையங்களில் அடிப்படை வசதிகள் மேற்கொள்ளப்பட்டு உள்ளன. 

வினாத்தாள்கள் மாவட்டத்தில் 11 இடங்களில் துப்பாக்கி ஏந்திய போலீஸ் பாதுகாப்புடன் வைக்கப்பட்டு உள்ளன.

இதே போன்று எஸ்.எஸ்.எல்.சி தேர்வை கோவில்பட்டி கல்வி மாவட்டத்தில் 7 ஆயிரத்து 214 பேரும், தூத்துக்குடி கல்வி மாவட்டத்தில் 11 ஆயிரத்து 55 பேரும், திருச்செந்தூர் கல்வி மாவட்டடத்தில் 5 ஆயிரத்து 730 பேரும் ஆக மொத்தம் 23 ஆயிரத்து 999 பேர் தேர்வு எழுதுகின்றனர். இவர்கள் தேர்வு எழுதுவதற்காக 103 தேர்வு மையங்கள் அமைக்கப்பட்டு உள்ளன. 

பிளஸ்-1 தேர்வை கோவில்பட்டியில் 6 ஆயிரத்து 130 பேரும், தூத்துக்குடியில் 9 ஆயிரத்து 605 பேரும், திருச்செந்தூரில் 5 ஆயிரத்து 286 பேரும் ஆக மொத்தம் 21 ஆயிரத்து 21 பேர் 85 மையங்களில் தேர்வு எழுத உள்ளனர். தொடர்ந்து பொதுத் தேர்வுக்கான ஏற்பாடுகளை அதிகாரிகள் செய்து உள்ளனர்.