தென்காசி அருகே முதியவர் கழுத்தை நெரித்து கொலை

தென்காசி:

தென்காசி அருகே உள்ள இலஞ்சி காளியம்மன் கோவில் தெருவைச் சேர்ந்தவர் கோட்டை மாடன் (வயது 82). இவர் இலஞ்சி பேரூராட்சி முன்னாள் தலைவி மைதீன் பாத் என்பவரின் தந்தை ஆவார். இவருக்கு சொந்தமான மாந்தோப்பு தென்காசியில் இருந்து இலஞ்சி செல்லும் சாலையில் உள்ளது. நேற்று காலை 6 மணியளவில் கோட்டை மாடன் தனது தோப்பிற்கு போய்விட்டு வருவதாக கூறிவிட்டு வீட்டிலிருந்து சென்றார்.

அதன்பிறகு 8 மணியளவில் அவரது இளைய மகள் சந்திரா தோப்பிற்கு சென்றார். அங்கு அவர் கண்ட காட்சி அதிர்ச்சி அடைய செய்தது. அந்த தோப்பில் கோட்டை மாடன் ரத்த காயங்களுடன் இறந்து கிடந்தார். அவரது தலையில் காயம் இருந்தது. வாய் வழியாக ரத்தம் வடிந்துள்ளது. அவர் கழுத்தை நெரித்து கொலை செய்யப்பட்டிருக்கலாம் என சந்தேகிக்கப்படுகிறது. 

இதுகுறித்த தகவல் அறிந்ததும் தென்காசி போலீஸ் துணை சூப்பிரண்டு மணிமாறன், குற்றாலம் போலீஸ் இன்ஸ்பெக்டர் தாமஸ் மற்றும் போலீசார் சம்பவ இடத்துக்கு சென்று விசாரணை நடத்தினர்.  கோட்டை மாடன் கொலைக்கான காரணம் என்ன? அவரை யார் கொலை செய்தார்கள்? என்பது குறித்து போலீசார் தீவிர விசாரணை நடத்தி வருகிறார்கள். கொலையான கோட்டைமாடன் உடல் தென்காசி அரசு ஆஸ்பத்திரிக்கு பிரேத பரிசோதனைக்கு அனுப்பி வைக்கப்பட்டது.

இந்தநிலையில் புளியரை அருகே வாலிபரை கொன்று புதைத்த மற்றொரு பயங்கர சம்பவம் நடந்துள்ளது. இதுபற்றிய விவரம் வருமாறு:-

தமிழக - கேரள எல்லையான தென்காசி மாவட்டம் புளியரை சோதனை சாவடி அருகே உள்ள மயிலாடும்பாறை என்ற பகுதியில் நேற்று காலை வனத்துறையினர் ரோந்து சென்றனர்.

அப்போது ஒரு பாறை அருகே துர்நாற்றம் வீசியது. இதனால் சந்தேகம் அடைந்த வனத்துறையினர் புளியரை போலீசாருக்கு தகவல் கொடுத்தனர். இதையடுத்து தென்காசி போலீஸ் துணை சூப்பிரண்டு மணிமாறன், இன்ஸ்பெக்டர்கள் பாலமுருகன், வேல்கனி மற்றும் போலீசார் அங்கு சென்றனர். பின்னர் அந்த இடத்தை தோண்டி பார்த்தபோது அதில் அழுகிய நிலையில் தலையில் பலத்த காயத்துடன் ஆண் உடல் இருந்தது தெரியவந்தது. அவர் வாலிபர் ஆக இருக்கலாம் என சந்தேகிக்கிறார்கள்.

கால்கள் இரண்டும் கயிற்றால் கட்டப்பட்டு இருந்தது. உடல் அழுகிய நிலையில் இருந்ததால் அவர் யார்? எந்த ஊரை சேர்ந்தவர்? என்பது பற்றிய விவரம் உடனடியாக தெரியவில்லை. மர்ம நபர்கள் அவரை கொலை செய்து குழி தோண்டி புதைத்து விட்டு சென்றுள்ளனர். இந்த பயங்கர கொலை குறித்து புளியரை போலீசார் வழக்குப்பதிவு செய்து தீவிர விசாரணை நடத்தி வருகிறார்கள்.