திண்டுக்கல் மாவட்டத்தில் 20 ஆயிரம் மாணவ-மாணவிகள் பிளஸ்-2 தேர்வு எழுதினர் 1,462 பேர் பங்கேற்கவில்லை

திண்டுக்கல்:

தமிழகம் முழுவதும் இன்றுபிளஸ்-2 பொதுத்தேர்வு தொடங்கியது. முதல் நாளாக இன்று தமிழ் பாடத்தேர்வு நடைபெற்றது. இதில் திண்டுக்கல் மாவட்டத்தை பொறுத்தவரை 212 பள்ளிகளில் பயிலும் 22 ஆயிரத்து 75 மாணவ-மாணவிகள், 245 தனித்தேர்வர்கள் என மொத்தம் 22 ஆயிரத்து 320 பேர் தேர்வுக்கு விண்ணப்பித்தனர். இதில் 10 ஆயிரத்து 894 மாணவர்கள், 11 ஆயிரத்து 426 மாணவிகள் இடம்பெற்று இருந்தனர்.

இவர்களுக்காக மாவட்டம் முழுவதும் 88 தேர்வு மையங்கள் அமைக்கப்பட்டு இருந்தன. இந்த தேர்வு மையங்களில் மாணவர்கள் சமூக இடைவெளியை கடைபிடிக்கும் வகையில் இருக்கைகள் போடப்பட்டு இருந்தன. மேலும் தேர்வு மையத்தின் வளாகத்தில் தேர்வு எழுதும் மாணவர்களை தவிர மற்றவர்கள் அனுமதிக்கப்படவில்லை. அதோடு செல்போன் எடுத்து வரவும் அனுமதி அளிக்கப்படவில்லை.

தேர்வு எழுத இருக்கும் மாணவ-மாணவிகள் தங்களுடைய ஆசிரியர்களிடம் வாழ்த்து பெற்றனர். மேலும் தேர்வு மையங்களில் காலை 9.45 மணிக்கு மாணவ-மாணவிகள் அனுமதிக்கப்பட்டனர். பலத்த சோதனைக்கு பின்னரே மாணவர்கள் அனுமதிக்கப்பட்டனர். இதையடுத்து காலை 10 மணிக்கு வினாத்தாள் வழங்கப்பட்டது. பின்னர் வினாத்தாளை மாணவர்கள் வாசித்து புரிந்து கொள்ள வசதியாக 15 நிமிடங்கள் ஒதுக்கப்பட்டது. அதன்பின்னர் மாணவ-மாணவிகள் தேர்வு எழுதினர்.

கொரோனா காரணமாக 2 ஆண்டுகள் பொதுத்தேர்வு நடைபெறாத நிலையில் இன்று தேர்வு நடைபெற்றதால், ஒருசில மாணவர்களிடம் பதற்றம் காணப்பட்டது. ஆனால் தேர்வு தொடங்கியதும் மாணவர்கள் பதற்றமின்றி இயல்பாக எழுதினர். இன்றைய தினம் மாவட்டம் முழுவதும் 10 ஆயிரத்து 166 மாணவர்கள், 10 ஆயிரத்து 692 மாணவிகள் என மொத்தம் 20 ஆயிரத்து 858 பேர் தேர்வு எழுதினர். 728 மாணவர்கள், 734 மாணவிகள் என 1,462 பேர் தேர்வில் பங்கேற்கவில்லை.

இதற்கிடையே தேர்வில் முறைகேடுகளை தடுக்க கல்வி அதிகாரிகளை கொண்ட 9 பறக்கும் படைகள் அமைக்கப்பட்டு இருந்தன. இந்த பறக்கும் படையினர் தேர்வு மையங்களில் ஆய்வு நடத்தினர். மேலும் 88 தேர்வு மையங்களிலும் 220 பேர் கொண்ட நிலைக்குழு நியமிக்கப்பட்டு தேர்வு முழுமையாக கண்காணிக்கப்பட்டது.

இந்த நிலையில் கலெக்டர் விசாகன் திண்டுக்கல் அரசு மகளிர் மேல்நிலைப்பள்ளி, நேருஜி நினைவு மேல்நிலைப்பள்ளியில் நடைபெற்ற பிளஸ்-2 தேர்வை திடீர் ஆய்வு செய்தார். அப்போது அந்த தேர்வு மையங்களில் குடிநீர் உள்ளிட்ட அடிப்படை வசதிகள் இருக்கிறதா? என்று அவர் சோதனை செய்தார். அப்போது முதன்மை கல்வி அலுவலர் கருப்புசாமி மற்றும் அதிகாரிகள் உடன் இருந்தனர்.

---------------------