அறந்தாங்கி அரசு ஆஸ்பத்திரியில் சிகிச்சை பெற்று பொதுத்தேர்வுக்கு தயாராகும் 4 மாணவர்கள்

புதுக்கோட்டை மாவட்டம் அறந்தாங்கியில் கட்டிட வேலைக்கு செல்லும் தொழிலாளர்கள் ஒரு பிரியாணி கடையில் இருந்து வாங்கி வந்த பிரியாணியை தங்களுடைய குடும்பத்தினருடன் சாப்பிட்டனர். அப்போது 41 பேருக்கு வாந்தி-மயக்கம் ஏற்பட்டது. இதையடுத்து அவர்கள் அறந்தாங்கி அரசு மருத்துவமனையில் அனுமதிக்கப்பட்டு சிகிச்சை பெற்று வருகின்றனர். இதில் ஹரிஹரசுதன், பார்த்திபன், அபிநயா ஆகிய 3 பேரும் பிளஸ்-2 வகுப்பும், ராமநாதன் 10-ம் வகுப்பும் படித்து வருகிறார்கள்.

இந்த நிலையில் இவர்களுக்கு தற்போது பொதுத்தேர்வு நடைபெறுவதால் மாணவர்கள் 4 பேரும் அரசு ஆஸ்பத்திரியில் சிகிச்சை பெற்றவாறே தேர்வுக்கு படித்து வருகிறார்கள். இவர்களை ஊக்கப்படுத்தும் விதமாக இவர்களது பெற்றோர் அருகிலேயே இருந்து வருகின்றனர்.