ஏலகிரிமலையில் மலைவாழ் மக்களுக்கு கொரோனா தடுப்பூசி சிறப்பு முகாம்

ஜோலார்பேட்டை

திருப்பத்தூர் மாவட்டத்தில் நேற்று கொரோனா தடுப்பூசி சிறப்பு முகாம் நடைபெற்றது. மாவட்டம் முழுவதும் 1,516 இடங்களில் நடமாடும் முகாம் நடத்தப்பட்டது. 

ஏலகிரிமலை ஊராட்சியில் அத்தனாவூர், நிலாவூர், மங்கலம், ஆரம்ப சுகாதார நிலையம் ஆகிய 4 இடங்களில் முகாம் நடைபெற்றது. ஏலகிரி மலை ஆரம்ப சுகாதார நிலைய மருத்துவர் சுமன் தலைமையில், சுகாதார பணியாளர்கள் பொதுமக்களுக்கு தடுப்பூசி செலுத்தினர். 

ஏலகிரி மலை ஊராட்சியில் முதல் தவணை தடுப்பூசி 100 சதவீதம் முடிக்கப்பட்டுள்ள நிலையில், 4 இடங்களில் நடைபெற்ற சிறப்பு முகாமில் மலைவாழ் மக்கள் பங்கேற்று தங்களது 2-வது தவணை தடுப்பூசியை செலுத்தி கொண்டனர். ஜோலார்பேட்டை வட்டார வளர்ச்சி அலுவலர் சிவகுமார் தடுப்பூசி முகாமை பார்வையிட்டு ஆய்வு செய்தார். ஊராட்சி மன்ற தலைவர் ராஜஸ்ரீ கிரிவேலன், ஊராட்சி மன்ற துணைத் தலைவர் அ.திருமால், வார்டு உறுப்பினர்கள் உடனிருந்தனர்.