பள்ளி மாணவர் குளத்தில் மூழ்கி சாவு

திங்கள்சந்தை:

இரணியல் அருகே திருவிழாவுக்கு வந்த பள்ளி மாணவர் குளத்தில் மூழ்கி பரிதாபமாக இறந்தார்

இந்த சம்பவம் குறித்து போலீஸ் தரப்பில் கூறியதாவது:-

கேரள மாநிலம் பாப்பனங்கோடு பகுதியை சேர்ந்தவர் சந்தோஷ். இவருடைய மகன் ராகுல் (வயது 16). இவர் அப்பகுதியில் உள்ள ஒரு பள்ளியில் 11-ம் வகுப்பு படித்து வந்தார்.

இந்தநிலையில் இரணியலில் உள்ள உறவினர் வீட்டுக்கு கோவில் திருவிழாவில் கலந்து கொள்ள ராகுல் வந்துள்ளார். நேற்று காலை ராகுல் உறவினர்களுடன் அப்பகுதியில் உள்ள ஒரு குளத்திற்கு குளிக்க சென்றார். 

அப்போது ராகுல் ஆழமான பகுதிக்கு சென்றதாகவும் நீச்சல் தெரியாததால் தண்ணீரில் தத்தளித்த நிலையில் மூழ்கியதாகவும் கூறப்படுகிறது. இது குறித்து உடனடியாக அப்பகுதி மக்கள் திங்கள்நகர் தீயணைப்பு நிலையத்துக்கு தகவல் தெரிவித்தனர்.

உடனே தீயணைப்பு வீரர்கள் விரைந்து வந்து குளத்தில் இறங்கி ராகுலை தேடினார்கள். ஆனால் ராகுல் அதற்குள் ஆற்றில் மூழ்கி இறந்து விட்டபிறகு, உடலை மீட்டனர். இது குறித்து இரணியல் போலீசுக்கு தகவல் தெரிவிக்கப்பட்டது. அதன்பேரில் போலீசார் சம்பவ இடத்துக்கு விரைந்து வந்து  ராகுல் உடலை மீட்டு பிரேத பரிசோதனைக்காக ஆசாரிபள்ளம் அரசு மருத்துவக்கல்லூரி ஆஸ்பத்திரிக்கு அனுப்பி வைத்தனர். 

இது குறித்து இரணியல் போலீசார் வழக்கு பதிவு செய்து விசாரணை நடத்தி வருகின்றனர்.

திருவிழாவுக்கு வந்த இடத்தில் மாணவர் பலியான சம்பவம் அந்த பகுதியில் சோகத்தை ஏற்படுத்தி உள்ளது.