<
ஓசியில் மது வாங்கி தராததால் ஆத்திரம் இறைச்சிக்கடை ஊழியர் குத்திக்கொலை தொழிலாளி கைது
போடி அருகே ஓசியில் மது வாங்கி தராததால், இறைச்சிக்கடை ஊழியரை கத்தியால் குத்தி தொழிலாளி கொலை செய்தார்.
போடி:
இறைச்சிக்கடை ஊழியர்
தேனி மாவட்டம் போடி குப்பிநாயக்கன்பட்டி பழைய போடிமெட்டு பாதையில் வசிப்பவர் கண்ணன் (வயது 45). இவர், இறைச்சிக்கடையில் கறி வெட்டும் ஊழியராக வேலை செய்து வந்தார்.
இவருக்கு மனைவி, 2 குழந்தைகள் உள்ளனர். கணவருடன் ஏற்பட்ட கருத்து வேறுபாடு காரணமாக அவரது மனைவி பிரிந்து சென்று தனது குழந்தைகளுடன் உசிலம்பட்டி அருகே உள்ள சுரக்காபட்டியில் பெற்றோர் வீட்டில் வசித்து வருகிறார். எனவே கண்ணன் மட்டும் தனியாக வசித்து வந்தார்.
கண்ணன் தினமும் இரவில், தனது வீட்டுக்கு அருகே வசிக்கும் கூலித்தொழிலாளியான ஞானசேகரன்(60) என்பவருடன் சோந்து மது அருந்துவது வழக்கம்.
குத்திக்கொலை
இந்தநிலையில் நேற்று ஞானசேகரன், கண்ணனிடம் ஓசியில் மது வாங்கி தருமாறு கேட்டார். அதற்கு, கண்ணன் பணம் இல்லை என்று கூறி ஞானசேகரனை திட்டியதாக கூறப்படுகிறது. இதனால் கண்ணன் மீது ஞானசேகரனுக்கு ஆத்திரம் ஏற்பட்டது.
இதற்கிடையே கண்ணன் தனது வீட்டில் இரவு படுத்திருந்தார். அங்கு சென்ற ஞானசேகரன், தான் மறைத்து வைத்திருந்த கத்தியால் கண்ணனின் நெஞ்சு மற்றும் கண்ணுக்கு கீழே குத்தினார். இதனால் வலி தாங்காமல் கண்ணன் அலறினார். இந்த சத்தம் கேட்டு அக்கம்பக்கத்தினர் அங்கு ஓடி வந்தனர். ஆனால் அதற்குள் ஞானசேகரன் அங்கிருந்து தப்பி ஓடிவிட்டார்.
ரத்தவெள்ளத்தில் உயிருக்கு போராடிய கண்ணனை அக்கம்பக்கத்தினர் மீட்டு சிகிச்சைக்காக தேனி அரசு மருத்துவகல்லூரி மருத்துவமனைக்கு கொண்டு சென்றனர். பின்னர் அவர், மேல்சிகிச்சைக்காக மதுரை அரசு மருத்துவமனைக்கு கொண்டு செல்லப்பட்டார். ஆனால் வழியிலேயே அவர் பரிதாபமாக உயிரிழந்தார்.
கைது-பரபரப்பு
இதுகுறித்து போடி நகர் போலீசில் புகார் செய்யப்பட்டது. அதன்பேரில் போலீசார் வழக்குப்பதிவு செய்து ஞானசேகரனை கைது செய்தனர். அவரிடம் போலீசார் தொடர்ந்து விசாரணை நடத்தி வருகின்றனர். இந்த சம்பவம் அந்த பகுதியில் பரபரப்பை ஏற்படுத்தி உள்ளது.
Related Tags :
Next Story
"Daily Thanthi" a prestigious product from The Thanthi Trust
எங்களைப்பற்றி தனித்தன்மை பாதுகாப்பு தொடர்புகொள்ள வலைத்தள தொகுப்பு ஆலோசனைகள் வேலைவாய்ப்பு
Paper Ad Tariff Web Ad Tariff Terms & Conditions (E-paper)
காப்புரிமை 2024, © The Thanthi Trust Powered by Hocalwire
