குன்னூர் அருகே முத்துமாரியம்மன் கோவிலுக்கு பால்குடம் அலகு குத்தி பக்தர்கள் நேர்த்திக்கடன்

குன்னூர்

குன்னூர் அருகே நல்லப்பன் தெரு கிராமத்தில் முத்துமாரியம்மன் கோவில் உள்ளது. இந்த கோவிலின் 63-வது திருக்கரகம் மற்றும் 3-ம் ஆண்டு பூப்பல்லக்கு உற்சவ விழா கடந்த 13-ந் தேதி கொடியேற்றத்துடன் தொடங்கியது. அன்றைய தினம் காப்பு கட்டுதல், அபிஷேக ஆராதனை அன்னதானம், கரக ஜோடனைக்கு புறப்படுதல் ஆகியவை நடைபெற்றன. 14-ந் தேதி அபிஷேக ஆராதனை, விளக்கு பூஜை, அன்னதானம், மாவிளக்கு பூஜை நடைபெற்றது. 

பின்னர் பூப்பல்லக்கு உற்சவம் கேட்டில் பவுண்டு முனிஸ்வரர் ஆலயத்திலிருந்து மேளதாளத்துடன் பவனியாக வந்து கோவிலை அடைந்தது. இதனை தொடர்ந்து உச்சிபூஜை நடைபெற்றது. 15-ந் தேதி பால்குடம் எடுத்தல், அலகு குத்தி வருதல், அம்மனின் திரு கரக திருவீதி உலா வரும் நிகழ்ச்சி நடைபெற்றது. இதில் ஏராளமான பக்தர்கள் பால்குடம் எடுத்தும், அலகு குத்தியும் நேர்த்திக்கடன் செலுத்தினார்கள். 

16-ந்தேதி (திங்கட்கிழமை)மஞ்சள் நீராட்டு மற்றும் அபிஷேக ஆராதனை, அம்மன் ஊஞ்சல் உற்சவம் மற்றும் மறு பூஜையும் விழா நிறைவு பெறுகிறது.