தனியாக வசித்து வந்த பெண் கழுத்தை அறுத்து கொலை

வசாய், 

தனியாக வசித்து வந்த பெண்ணை கழுத்தை அறுத்து கொலை செய்தவரை போலீசார் கைது செய்தனர். 

 பால்கர் மாவட்டம் வசாய் மேற்கு நியூ எவர்சைன் கார்டன் என்ற கட்டிடத்தில் வசித்து வந்தவர் சங்கீதா ரிபெல்லோ (வயது45). இவரது கணவர் வெளிநாட்டில் வசித்து வருவதால் வீட்டில் தனியாக இருந்து வந்தார். சம்பவத்தன்று மாலையில் பெண் ஒருவர் ஆண் நண்பருடன் அவரது வீட்டிற்கு வந்தார். சங்கீதா ரிபெல்லோவுடன் பேசி கொண்டிருந்தபோது அவர்களுக்கு இடையே திடீரென வாக்குவாதம் ஏற்பட்டது. 

  பெண்ணின் உடன் வந்தவர் சமையல் அறைக்கு சென்று அங்கிருந்த கத்தியை எடுத்து சங்கீதா ரிபெல்லாவின் கழுத்தை அறுத்து உள்ளார்.

 இதனால் அதிர்ச்சி அடைந்த உடன் வந்த பெண் அலறி சத்தம் போட்டு அக்கம் பக்கத்தினரின் உதவியை நாடினார். கத்தியால் அறுத்தவர் அங்கிருந்து தப்பி ஓடி விட்டார். அக்கம் பக்கத்தினர் போலீசுக்கு தகவல் அளித்தனர். இந்த தகவலின் படி போலீசார் சம்பவ இடத்திற்கு சென்றனர்.

  அங்கு ரத்த வெள்ளத்தில் கிடந்த பெண் சங்கீதா ரிபெல்லாவை மீட்டு ஆஸ்பத்திரிக்கு அனுப்பி வைத்தனர். அங்கு டாக்டர் நடத்திய பரிசோதனையில் அவர் ஏற்கனவே உயிரிழந்ததாக தெரிவித்தனர். 

இது குறித்து போலீசார் வழக்கு பதிவு செய்து சம்பவ இடத்தில் இருந்த பெண்ணிடம் விசாராணை நடத்தினர். அவர் கொடுத்த தகவலின்படி தப்பி சென்ற கொலையாளியை பிடித்து கைது செய்தனர். கொலைக்கான காரணம் குறித்து விசாரணை நடத்தி வருகின்றனர்.