முதியவரை தாக்கிய 3 பேர் மீது வழக்கு

கரூர் மாவட்டம், குந்தாணிபாளையம் பகுதியை சேர்ந்தவர் சுப்பிரமணி(வயது 70). விவசாயி. அதே பகுதியை சேர்ந்த வீரமணி என்பவர் மேய்த்துக்கொண்டிருந்த ஆடு சுப்பிரமணியின் தோட்டத்திற்கு சென்று மேய்ந்து கொண்டிருந்தது. அதைப்பார்த்த சுப்பிரமணி, வீரமணியை பார்த்து கண்டித்துள்ளார். அப்போது அதே பகுதியை சேர்ந்த சுரேஷ், செல்லம்மாள், வீரமணி ஆகிய 3 பேரும் சேர்ந்து சுப்பிரமணியை தகாத வார்த்தைகளால் திட்டியுள்ளனர். அப்போது இருவருக்கும் வாக்குவாதம் ஏற்பட்டது. இதில் ஆத்திரம் அடைந்த சுரேஷ், வீரமணி, செல்லம்மாள் ஆகிய 3 பேரும் சேர்ந்து சுப்பிரமணியை கடுமையாக தாக்கியுள்ளனர். இதில் அவருக்கு தலை மற்றும் பல்வேறு பகுதிகளில் பலத்த காயம் ஏற்பட்டது. அக்கம் பக்கத்தினர் ஓடிவந்தனர். அதைப் பார்த்த மூவரும் சுப்பிரமணிக்கு கொலை மிரட்டல் விடுத்துவிட்டு தப்பி சென்றுவிட்டனர்.  பின்னர் அங்கிருந்தவர்கள் சுப்பிரமணியை மீட்டு சிகிசைக்காக கரூர் அரசு மருத்துவக் கல்லூரி மருத்துவமனைக்கு அனுப்பி வைத்தனர். அங்கு அவருக்கு சிகிச்சை அளிக்கப்பட்டு பின்னர் அங்கிருந்து மேல் சிகிச்சைக்காக திருச்சி அரசு மருத்துவக் கல்லூரி மருத்துவமனைக்கு அனுப்பி வைத்தனர். அங்கு அவருக்கு தீவிர சிகிச்சை அளிக்கப்பட்டு வருகிறது. இதையடுத்து  சுப்பிரமணி கொடுத்த புகாரின் பேரில் சுரேஷ், வீரமணி, செல்லம்மாள் ஆகியோர் மீதும், வீரமணி கொடுத்த புகாரின் பேரில் சுப்பிரமணி மீதும் வேலாயுதம்பாளையம் போலீஸ் சப்- இன்ஸ்பெக்டர் பெரியசாமி வழக்குப்பதிவு செய்து தீவிர விசாரணை நடத்தி வருகிறார்.