பெங்களூரு பரப்பன அக்ரஹாரா சிறையில் அதிகாரிகள் ‘திடீர்’ சோதனை

பெங்களூரு,

பெங்களூரு பரப்பன அக்ரஹாரா சிறையில் உள்ள சசிகலாவுக்கு ரூ.2 கோடி வரை லஞ்சம் வாங்கிக்கொண்டு சிறப்பு வசதிகள் செய்து கொடுக்கப்பட்டு இருப்பதாக சிறைத்துறை டி.ஐ.ஜி. ரூபா பரபரப்பு தகவலை வெளியிட்டார்.

இதற்கு டி.ஜி.பி. சத்திய நாராயணராவ் மறுப்பு தெரிவித்தார்.

இந்த சம்பவம் காரணமாக ஐ.பி.எஸ். அதிகாரிகளான சத்திய நாராயணராவ், ரூபா இடையே மோதல் ஏற்பட்டுள்ளது. சிறையில் நடக்கும் முறைகேடுகள் தொடர்பாக ஓய்வு பெற்ற ஐ.ஏ.எஸ். அதிகாரி வினய்குமார் தலைமையில் விசாரணை நடத்தி அறிக்கை தாக்கல் செய்ய முதல்-மந்திரி சித்தராமையா உத்தரவிட்டுள்ளார்.

அதிகாரி வினய்குமார் விரைவில் விசாரணையை தொடங்க உள்ளார்.

இந்த நிலையில், பரப்பன அக்ரஹாரா சிறைக்கு நேற்று சிறைத்துறை டி.ஜி.பி. சத்திய நாராயணராவ் சென்று ஆய்வு செய்தார். இந்த ஆய்வின்போது, அவர் சிறை சூப்பிரண்டு கிருஷ்ணகுமாருடன் ஆலோசனை நடத்தி உள்ளார்.

அப்போது, சிறைக்கு விசாரணை அதிகாரிகள் ஆய்வுக்கு வரலாம். எனவே, சிறையில் எந்த தவறுகளும் நடக்காமல் பார்த்துக்கொள்ள வேண்டும். சிறையில் இயங்காமல் உள்ள கண்காணிப்பு கேமராக்களை சரிசெய்ய வேண்டும் என அவர் கிருஷ்ணகுமாருக்கு உத்தரவிட்டுள்ளதாக தகவல்கள் வெளியாகி உள்ளது. இந்த ஆய்வின்போது, சில முக்கிய ஆதாரங்கள் அழிக்கப்பட்டதாக கூறப்படுகிறது.

இந்த ஆய்வை முடித்து விட்டு வெளியே வந்த டி.ஜி.பி. சத்திய நாராயணராவிடம் நிருபர்கள் பேட்டி காண முயன்றார்கள். ஆனால் அவர் நிருபர்களை சந்திக்காமல் சிறையில் இருந்து காரில் புறப்பட்டு சென்று விட்டார்.

இந்த நிலையில், டி.ஜி.பி. சத்திய நாராயணராவ் பரப்பன அக்ரஹாரா சிறையில் ஆய்வு செய்து விட்டு வெளியே சென்ற பின்பு, டி.ஐ.ஜி. ரூபாவும் சிறைக்கு வந்தார். சிறையையொட்டி உள்ள பரப்பன அக்ரஹாரா போலீஸ் நிலையத்தில் பணியாற்றும் சப்-இன்ஸ்பெக்டர் பாபு என்பவரை தனது காரில் ஏற்றிக்கொண்டு டி.ஐ.ஜி. ரூபா சிறைக்குள் ஆய்வு செய்ய சென்றார்.

அப்போது, சிறை ஆய்வுக்கு எதிர்ப்பு தெரிவித்து சிறை சூப்பிரண்டு கிருஷ்ணகுமார் அவரை தடுத்து நிறுத்தியதாக கூறப்படுகிறது.

இதற்கு ரூபா எதிர்ப்பு தெரிவித்துள்ளார். இதுதொடர்பாக அவர்களுக்குள் வாக்குவாதம் ஏற்பட்டுள்ளது. இதனைத்தொடர்ந்து, சிறையின் பல்வேறு பகுதிகளுக்கு சென்று டி.ஐ.ஜி. ரூபா ஆய்வு செய்தார். இந்த ஆய்வின்போது சிறையில் உள்ள கைதிகள் அவருக்கு எதிராகவும், சிறைத்துறை டி.ஜி.பி. சத்திய நாராயணராவுக்கு ஆதரவாகவும் கோஷங்கள் எழுப்பியதாக சொல்லப்படுகிறது. சிறையில் சிறிது நேரம் இருந்துவிட்டு டி.ஐ.ஜி. ரூபா அங்கிருந்து காரில் புறப்பட்டு சென்று விட்டார்.

டி.ஜி.பி. சத்திய நாராயணராவும் அவரை தொடர்ந்து டி.ஐ.ஜி. ரூபாவும் சிறைக்கு வந்து போட்டி ஆய்வு நடத்தியது பரபரப்பை ஏற்படுத்தி உள்ளது. டி.ஜி.பி. சத்திய நாராயணராவ் சிறைக்கு வந்து விட்டு சென்றதால், அங்கு நடைபெறும் முறைகேடுகள் தொடர்பான ஆதாரங்கள் அழிக்கப்பட்டு உள்ளதா? என்பது குறித்து ஆய்வு செய்வதற்காக டி.ஐ.ஜி. ரூபா சிறைக்கு வந்து சென்றிருக்கலாம் என்று கூறப்படுகிறது.

அவ்வாறு ஆதாரங்கள் அழிக்கப்பட்டு இருந்தால், அதுபற்றி விசாரணை அதிகாரி வினய்குமாரிடம் புகார் தெரிவிக்கலாம் என்பதற்காக டி.ஐ.ஜி. ரூபா சிறைக்கு வந்ததாகவும் கூறப்படுகிறது.

சிறைத்துறை ஏ.ஐ.ஜி. வீரபத்ரசாமி பரப்பன அக்ரஹாரா சிறைக்கு சென்று நேற்றுமுன் தினம் காலை 11 மணி முதல் மாலை 4.30 மணி வரை ஆய்வு செய்த தகவல் வெளியாகி உள்ளது. கண்காணிப்பு கேமராக்கள் நன்றாக இயங்குகிறதா? என்பதையும் அவர் ஆய்வு செய்துள்ளார். அதில் பல்வேறு கண்காணிப்பு கேமராக்கள் இயங்காமல் இருப்பது தெரியவந்தது.

இது தொடர்பாக மாநில போலீஸ் தகவல் தொழில்நுட்ப பிரிவு அதிகாரிகளுக்கு தகவல் கொடுத்தார். அதன்பேரில் 7 பேர் கொண்ட தொழில்நுட்ப பிரிவினர் வந்து கண்காணிப்பு கேமராக்களை ஆய்வு செய்தனர். அதோடு கண்காணிப்பு கேமராவில் பதிவான காட்சிகளையும் அவர்கள் ஆய்வு செய்து வருகின்றனர். இந்த ஆய்வு மேலும் சில நாட்கள் நீடிக்கும் எனவும் சொல்லப்படுகிறது.

இந்த சிறையில் மொத்தம் 4,500 கைதிகள் உள்ளனர். சிறையில் மொத்தம் 126 டி.வி.க்கள் பொருத்தப்பட்டு உள்ளன. சிறையில் அதிகாரிகள் மட்டுமின்றி தொழில்நுட்ப பிரிவினரும் சோதனை நடத்தி வருவது பரபரப்பை ஏற்படுத்தி உள்ளது.