வாஜ்பாய், அத்வானியுடன் துணை ஜனாதிபதி வேட்பாளர் வெங்கையா நாயுடு சந்திப்பு

புதுடெல்லி,

துணை ஜனாதிபதியாக இருக்கும் ஹமீது அன்சாரியின் பதவி காலம் அடுத்த மாதம் (ஆகஸ்டு) 10-ந் தேதியுடன் முடிவடைவதால் அவருக்கு பதிலாக புதிய துணை ஜனாதிபதியை தேர்ந்து எடுக்க ஆகஸ்டு 5-ந் தேதி தேர்தல் நடைபெறுகிறது. துணை ஜனாதிபதி தேர்தலில் காங்கிரஸ் உள்ளிட்ட 18 எதிர்க்கட்சிகள் கூட்டணியின் சார்பில் மேற்கு வங்காள முன்னாள் கவர்னர் கோபால கிருஷ்ண காந்தி போட்டியிடுகிறார். பாரதீய ஜனதா கூட்டணியின் சார்பில், துணை ஜனாதிபதி பதவிக்கு வெங்கையா நாயுடு போட்டியிடுகிறார். 

எதிர்க்கட்சிகளின் சார்பில் துணை ஜனாதிபதி பதவிக்கு போட்டியிடும் கோபால கிருஷ்ண காந்தி, இன்று தனது வேட்பு மனுவை தாக்கல் செய்தார்.  அதேபோல், ஆளும் பாஜக சார்பில் நிறுத்தப்பட்டுள்ள வெங்கையா நாயுடுவும் தனது வேட்பு மனுவை இன்று தாக்கல் செய்தார். வெங்கையா நாயுடு வேட்பு மனு தாக்கலின் போது பிரதமர் மோடி உள்ளிட்டோர் உடன் இருந்தனர். 

இந்த நிலையில், துணை ஜனாதிபதி வேட்பாளராக அறிவிக்கப்பட்ட பின் வெங்கையா நாயுடு, வேட்பு மனு தாக்கல் செய்யும் முன் பாரதீய ஜனதா கட்சியின் முதுபெரும் தலைவரான வாஜ்பாயை அவரது இல்லத்தில் சந்தித்து ஆசிபெற்றார். 

அதேபோல், பாஜகவின் மூத்த தலைவர்களான அத்வானி, முரளி மனோகர் ஜோஷி ஆகியோரையும் சந்தித்தார். தொடர்ந்து, அதிமுக, ஒய்.எஸ்.ஆர்.சி.பி மற்றும் டி.ஆர்.எஸ் கட்சியின் மூத்த தலைவர்களையும் சந்தித்து ஆதரவு கோரினார். சமாஜ்வாடி கட்சி தலைவர் முலாயம் சிங் யாதவும் வெங்கையா நாயுடுவுக்கு தனது ஆதரவை தெரிவித்தார்.