2019 தேர்தலில் மீண்டும் பா.ஜனதா தலைமையிலான கூட்டணி ஆட்சியை கைப்பற்றும் - கருத்துக்கணிப்பு

பா.ஜனதா தலைமையிலான தேசிய ஜனநாயக கூட்டணிக்கு 283 தொகுதிகள் கிடைக்கும் எனவும் காங்கிரஸ் தலைமையிலான ஐக்கிய முற்போக்கு கூட்டணிக்கு 135 தொகுதிகள் கிடைக்கும் எனவும் மற்றவை 125 இடங்களை கைப்பற்றும் எனவும் டைம்ஸ் நவ்-  விஎம்ஆர் கருத்துக்கணிப்பில் தெரிவிக்கப்பட்டுள்ளது. பெரிதும் எதிர்பார்க்கப்படும் 80 தொகுதிகளைக் கொண்ட உ.பி.யில் பா.ஜனதா 42 தொகுதிகளில் வெற்றிப்பெறும் என்றும் காங்கிரஸ் இரண்டு தொகுதிகளில் வெற்றிப்பெறும் என்றும் சமாஜ்வாடி - பகுஜன் சமாஜ் கூட்டணி 36 தொகுதிகளில் வெற்றிப்பெறும் என்றும் தெரிவிக்கப்பட்டுள்ளது.

மேற்கு வங்காளத்தில் திரிணாமுல் காங்கிரஸ் - பா.ஜனதா இடையே கடுமையான போட்டி நிலவும் என்றும் திரிணாமுல் காங்கிரஸ் 31 தொகுதிகளிலும், பா.ஜனதா 11 தொகுதிகளிலும் வெற்றிப்பெறும் என தெரிவிக்கப்பட்டுள்ளது. மராட்டியத்தில் பா.ஜனதா கூட்டணி 39 இடங்களிலும், காங்கிரஸ் கூட்டணி 9 இடங்களிலும் வெற்றிப்பெறும் என தெரிவிக்கப்பட்டுள்ளது. பீகாரில் பா.ஜனதா கூட்டணிக்கு  27 தொகுதியும், காங்கிரஸ் கூட்டணிக்கு 13 தொகுதியும் கிடைக்கும் என தெரிவிக்கப்பட்டுள்ளது.