50 இடங்களில் வருமான வரி அதிகாரிகள் அதிரடி சோதனை: மத்திய பிரதேச முதல்-மந்திரிக்கு நெருக்கமானவர்கள் வீடு, அலுவலகங்களில் கோடிக்கணக்கான பணம் சிக்கியது

இந்தூர்,

கடந்த ஆண்டு இறுதியில், மத்தியபிரதேசத்தில் நடந்த சட்டசபை தேர்தலில், காங்கிரஸ் கட்சி ஆட்சியை பிடித்தது. கமல்நாத், முதல்-மந்திரி ஆனார்.

தற்போது, நாடாளுமன்ற தேர்தல் நடந்து வரும் நிலையில், கமல்நாத்துக்கு நெருக்கமானவர்கள் மற்றும் உறவினர்கள் ‘ஹவாலா’ பண பரிமாற்றத்தில் ஈடுபடுவதாக புகார்கள் வந்தன. அவர்கள் வரி ஏய்ப்பு செய்துள்ளதாகவும் குற்றச்சாட்டுகள் கூறப்பட்டன.

இதையடுத்து, நேற்று அதிகாலை 3 மணியளவில் கமல்நாத்துக்கு நெருக்கமானவர்களை குறிவைத்து வருமான வரி சோதனை தொடங்கியது. டெல்லி, மத்தியபிரதேச மாநில தலைநகர் போபால், இந்தூர் ஆகிய நகரங்களில் சுமார் 50 இடங்களில் ஒரே நேரத்தில் அதிரடி சோதனை நடைபெற்றது.

இதில், சுமார் 300 வருமான வரி மற்றும் போலீஸ் அதிகாரிகள் ஈடுபட்டனர்.

குறிப்பாக, மத்தியபிரதேச முதல்-மந்திரி கமல்நாத்தின் முன்னாள் சிறப்பு அதிகாரி பிரவீன் காக்கர் தொடர்புடைய இடங்களில் டெல்லியில் இருந்து வந்த வருமான வரி அதிகாரிகள் சோதனை நடத்தினர்.

இந்தூர் நகரில் உள்ள காக்கர் இல்லம், போபால் நகரில் உள்ள அவரது இல்லம் மற்றும் அவர் தொடர்புடைய இதர இடங்களில் சோதனை நடைபெற்றது. இதில், பல்வேறு முக்கிய ஆவணங்கள் சிக்கியதாக தெரிகிறது. அவற்றை அதிகாரிகள் விரிவாக ஆய்வு செய்து வருகிறார்கள்.

பிரவீன் காக்கர், முன்னாள் போலீஸ் அதிகாரி ஆவார். கடந்த டிசம்பர் மாதம், கமல்நாத் முதல்-மந்திரி ஆனவுடன், அவருடைய சிறப்பு அதிகாரியாக காக்கர் நியமிக்கப்பட்டார். நாடாளுமன்ற தேர்தல் அறிவிப்புக்கு முன்பாக, அவர் பதவி விலகினார். ஐக்கிய முற்போக்கு கூட்டணி ஆட்சி காலத்தின்போது, மத்திய மந்திரியாக இருந்த காந்திலால் பூரியாவிடமும் பிரவீன் காக்கர் சிறப்பு அதிகாரியாக பணியாற்றினார்.

அவரது குடும்பம், ஓட்டல் உள்பட பல்வேறு தொழில்களில் ஈடுபட்டு வருவது குறிப்பிடத்தக்கது.

இதுபோல், முதல்-மந்திரி கமல்நாத்தின் முன்னாள் ஆலோசகர் ராஜேந்திர மிக்லானி தொடர்புடைய இடங்களிலும் சோதனை நடைபெற்றது. இவரும் நாடாளுமன்ற தேர்தல் அறிவிப்புக்கு முன்பாக பதவி விலகியவர் ஆவார்.

கமல்நாத்தின் மைத்துனருடைய மோசர் பேர் நிறுவனம், மற்றொரு உறவினர் ரதுல் பூரியின் நிறுவனம் ஆகியவற்றில் பணியாற்றும் உயர் அதிகாரிகள் தொடர்புடைய இடங்களிலும் வருமான வரி சோதனை நடைபெற்றது.

கமல்நாத்தின் உறவினர் ரதுல் பூரிக்கு ஹெலிகாப்டர் பேர ஊழல் வழக்கிலும் தொடர்பு இருப்பதாக புகார் எழுந்துள்ளது. அதனால் அவரிடம் கடந்த வாரம் அமலாக்கத்துறை அதிகாரிகள் டெல்லியில் விசாரணை நடத்தினர்.

கொல்கத்தாவை சேர்ந்த தொழில் அதிபர் பரஸ் மால் லோதாவுக்கு சொந்தமான இடங்களிலும் வருமான வரி சோதனை நடைபெற்றது. அங்கு ஆவணங்கள் கைப்பற்றப்பட்டன.

இந்த சோதனைகளில், கணக்கில் காட்டப்படாத ரூ.9 கோடி ரொக்கப்பணம் கைப்பற்றப்பட்டு இருப்பதாக தெரிகிறது.

இதற்கிடையே, இந்த வருமான வரி சோதனை தொடர்பாக காங்கிரஸ் கட்சியும், பா.ஜனதாவும் பரஸ்பரம் குற்றச்சாட்டுகளை தெரிவித்துள்ளன.

அரசியல் பழிவாங்கும் நடவடிக்கையாக, எதிர்க்கட்சி தலைவர்களை குறிவைத்து சோதனை நடத்தப்படுவதாக மத்தியபிரதேசத்தை சேர்ந்த காங்கிரஸ் ஊடகப்பிரிவு துணைத்தலைவர் பூபேந்திர குப்தா குற்றம் சாட்டினார்.

அதற்கு பதிலடியாக பா.ஜனதா பொதுச்செயலாளர் கைலாஷ் விஜய்வர்கியா கூறுகையில், “மத்தியபிரதேச முதல்-மந்திரி கமல்நாத்தின் தனிச் செயலாளர் வீட்டில் நடந்த சோதனையில், கோடிக் கணக்கான ரூபாய் கருப்பு பணம் கைப்பற்றப்பட்டுள்ளது. காங்கிரஸ் குற்றம் சாட்டு வது, காவலாளி மீது திருடர் கள் புகார் கூறுவதுபோல் இருக்கிறது” என்றார்.