கோவா மாநில மக்களுக்கு தனியார் தொழிற்சாலைகளில் 80 சதவீத இடஒதுக்கீடு

பனாஜி,

ஆந்திராவை தொடர்ந்து, கோவா மாநிலத்திலும் தனியார் தொழிற்சாலைகளில் அந்த மாநில மக்களுக்கு இடஒதுக்கீடு வழங்க முடிவு செய்யப்பட்டு உள்ளது.

கோவா மாநிலத்தில் உள்ள தனியார் தொழிற்சாலைகளில், மாநில மக்களுக்கு 80 சதவீத இடஒதுக்கீடு வழங்கப்படும் என்று, மாநில முதல்-மந்திரி பிரமோத் சாவந்த் நேற்று சட்டசபையில் அறிவித்தார். இதுகுறித்து அவர் பேசும்போது, 80 சதவீத ஒதுக்கீட்டில் 60 சதவீதம் பேருக்கு நிரந்தர பணி ஒதுக்கப்பட வேண்டும் என்றும் தெரிவித்தார்.

இதுபோன்ற இடஒதுக்கீடு வழங்குவதற்கு தனி கொள்கை உருவாக்குவது அவசியம் என்பதால் இன்னும் 6 மாதங்களில் தொழிலாளர் மற்றும் வேலைவாய்ப்பு கொள்கைகள் புதிதாக உருவாக்கப்படும் என்றும் முதல்-மந்திரி கூறினார்.

மேலும் அவர் கூறுகையில், “தனியார் தொழிற்சாலைகள் மாநில அரசிடம் இருந்து பல்வேறு மானியங்களை பெறுகின்றன. எனவே அந்த நிறுவனங்கள் வேலைவாய்ப்பில் இந்த மாநில மக்களுக்கு 80 சதவீதம் வேலைவாய்ப்பை வழங்க வேண்டும்” என தெரிவித்தார்.