இந்தியாவில் கொரோனா பாதிப்பு 31 ஆக உயர்வு ; 6 மாநிலங்களுக்கு எச்சரிக்கை

புதுடெல்லி

சீனா யுகான் நகரில் தோன்றிய கொரோனா வைரசுக்கு உலகம் முழுவதும் இதுவரை  98,424 பேர் பாதிக்கப்பட்டு உள்ளனர். சீனாவில் மட்டும் 3042 பேர் பலியாகி உள்ளனர். உலகம் முழுவதும்  3,386 பேர் பலியாகி உள்ளனர். 55,638  பேர் இந்த நோயில் இருந்து குணமாகி உள்ளனர்.

இந்தியாவில் டெல்லி, ராஜஸ்தான், உத்தரபிரதேசம் மற்றும் தெலுங்கானாவில்  30 பேர் கொரோனா வைரசால் பாதிக்கப்பட்டு சிகிச்சை பெற்று வருகிறார்கள்.  தமிழ்நாடு, கர்நாடகா, மத்தியப் பிரதேசம் போன்ற மாநிலங்களும் சிலரைத் தனிமைப்படுத்தியுள்ளன.

தற்போது டெல்லியில் மேலும் ஒருவருக்கு கொரோனா வைரஸ்  பாதிப்பு இருப்பது கண்டறியப்பட்டு உள்ளது. இதனால்  இந்தியாவில் கொரோனா வைரஸ் பாதிப்பு 31 ஆக உயர்ந்து உள்ளது. இந்த நோயாளி சமீபத்தில் தாய்லாந்து மற்றும் மலேசியாவுக்குச் சென்று வந்துள்ளார். நோயாளி  கண்காணிக்கப்பட்டு வருகிறார் என்று மத்திய சுகாதார அமைச்சகம் வெளியிட்டுள்ள அறிக்கையில் தெரிவிக்கப்பட்டுள்ளது.

இந்தியாவில் கொரோனா வைரஸ் பயத்தை அடுத்து, மத்திய உள்துறை அமைச்சகம் மேற்கு வங்கம், பீகார், உத்தரபிரதேசம், பஞ்சாப், சிக்கிம் மற்றும் உத்தரகாண்ட் ஆகிய ஆறு மாநிலங்களுக்கு ஒரு எச்சரிக்கையை வெளியிட்டுள்ளது மற்றும் தொற்றுநோய் தொடர்பாக செய்ய வேண்டியவை மற்றும் செய்யக்கூடாதவைகள் குறித்து  ஆலோசனைகளை பட்டியலிட்டுள்ளது.

தொற்றுநோயை சமாளிக்க மத்திய அரசு போதுமான நடவடிக்கைகளை எடுத்து வருவதாக மத்திய சுகாதார அமைச்சர் ஹர்ஷ் வர்தானும் உறுதியளித்துள்ளார்.

டெல்லியில் உள்ள லோக் நாயக் ஜெய் பிரகாஷ் நாராயண் (எல்.என்.ஜே.பி) மருத்துவமனையில் பதினொரு தனிமை அறைகள் அமைக்கப்பட்டுள்ளதாக டெல்லி சுகாதார அமைச்சர் சத்யேந்தர் ஜெயின் தெரிவித்துள்ளார். 

கொரோனா வைரஸ் நோயாளிகளுக்கு அனைத்து அதிகாரிகளும், தேசிய மற்றும் மாநில அளவில், நோயாளிகளைக் கண்காணிக்கவும், கவனிக்கவும் முழுமையான கவனம் செலுத்தப்படுவதாக உறுதியளித்துள்ளனர்.

சுகாதாரம், பாதுகாப்பு, வெளிவிவகாரங்கள், சிவில் விமானப் போக்குவரத்து, உள்துறை, ஜவுளி, பார்மா, வர்த்தகம் மற்றும் மாநில தலைமைச் செயலாளர்கள் உள்ளிட்ட பிற அதிகாரிகளுடன் தொடர்புடைய மதிப்பாய்வுகள் தொடர்ந்து நடத்தப்பட்டு வருகின்றன.

இது தொடர்பாக சரியான நேரத்தில் பயண ஆலோசனைகளும் வழங்கப்பட்டுள்ளன.

அரசாங்கம் 24/7 ஹெல்ப்லைன் எண் + 91-11-2397 8046 மற்றும் ஒரு மின்னஞ்சல் ஐடி ncov2019@gmail.com ஆகியவற்றை வெளியிட்டுள்ளது, இதன் மூலம் மக்கள் இது தொடர்பாக கூடுதல் தகவல்களைப் பெறலாம் மற்றும் எந்தவொரு கொரோனா வைரஸ் அவசர காலத்திலும் உதவி பெறலாம் எனக்கூறி உள்ளது.