மதுக்கடைகள் திறப்பு: காற்றில் பறக்க விடப்பட்ட சமூக இடைவெளி

புதுடெல்லி

இந்தியாவில் மே 17 ந்தேதி வரை 3-வது கட்ட ஊரடங்கு நீட்டிக்கப்பட்டு உள்ளது.  சில நிபந்தனைகளுடன் மதுபானக் கடைகளை திறக்க மாநில அரசுகளுக்கு மத்திய அரசு அனுமதி அளித்துள்ளது.

மத்திய உள்துறை அமைச்சகம் பரிந்துரைத்த  ஊரடங்கு  தளர்த்தல்களை அமல்படுத்த டெல்லி அரசு ஞாயிற்றுக்கிழமை அறிவிப்புகளை வெளியிட்டது. இதை தொடர்ந்து டெல்லியில் கொரோனா வைரஸ் கட்டுப்பாட்டு மண்டலங்களுக்கு வெளியே அமைந்துள்ள சுமார் 150 மதுபான கடைகள் திங்கள்கிழமை முதல் திறக்கப்படும் என்று எதிர்பார்க்கப்பட்டது.

இதை தொடர்ந்து இன்று காலை நாட்டின் பல்வேறு பகுதிகளில் உள்ள மதுபானக் கடைகளுக்கு வெளியே ஆயிரக்கணக்கான மக்கள் கூடினர். 100 க்கும் மேற்பட்ட மக்கள் திரண்டனர் டெல்லியின் மாளவியா நகரில் உள்ள ஒரு மதுபான கடைக்கு வெளியே, கூட்டம் கூடியதால் கடை உரிமையாளர் போலீசாரை பாதுகாப்புக்கு அழைத்தார். இதே போல மற்ற மதுபானக் கடைகளுக்கு வெளியேயும் கூட்டம் காணப்பட்டது. அங்கு மதுபான பிரியர்கள் சமூக தொலைதூர விதிமுறைகளை மீறினர்.

இதுபோல் சத்தீஸ்காரில், கட்டுப்பாட்டு பகுதிகளை தவிர்த்து பிற பகுதிகளில் மதுக்கடைகளை திறக்க அனுமதிக்கப்பட்டுள்ளது. மது வாங்க வருபவர்கள் முறையாக சமூக இடைவெளியை பின்பற்றுவதற்கு வட்டங்களும் வரையப்பட்டிருந்தன. ஆனால், ராஜ்நந்தகோன் என்ற இடத்தில், மதுக் கடையைத் திறந்தவுடன் ஏராளமானோர் திரண்டதால், விதிமுறைகள் காற்றில் பறக்கவிடப்பட்டன.