<
அறிகுறியற்ற, உறுதிப்படுத்தப்பட்ட டிக்கெட் வைத்திருப்பவர்கள் மட்டுமே ரெயில்களில் பயணிக்க அனுமதி
கொரோனா அறிகுறியற்ற, உறுதிப்படுத்தப்பட்ட டிக்கெட் வைத்திருப்பவர்கள் மட்டுமே நாளை முதல் ரயில்களில் பயணிக்க அனுமதிக்கப்படுவார்கள்
புதுடெல்லி
கொரோனா பாதிப்பின் காரணமாக நாடு முழுவதும் ஊரடங்கு அமல்படுத்தப்பட்டதால், கடந்த மார்ச் மாதம் 24-ந் தேதி முதல் பயணிகள் ரெயில் போக்குவரத்து ரத்து செய்யப்பட்டது. புலம்பெயர்ந்த தொழிலாளர்களை அவர்களுடைய சொந்த மாநிலங்களுக்கு அனுப்பி வைப்பதற்காக கடந்த 1-ந் தேதி முதல் முக்கிய ஊர்களில் இருந்து சிறப்பு ரெயில்கள் மட்டும் இயக்கப்படுகின்றன.
இந்த நிலையில், நிறுத்தி வைக்கப்பட்டுள்ள பயணிகள் ரெயில் போக்குவரத்து நாளை (செவ்வாய்க்கிழமை) முதல் மீண்டும் தொடங்குவதாக ரெயில்வே நிர்வாகம் அறிவித்து உள்ளது.
ரெயில்வே நிர்வாகம் வெளியிட்டுள்ள செய்திக்குறிப்பில்
ரெயில் போக்குவரத்தை படிப்படியாக தொடங்கும் வகையில் 12-ந் தேதியில் (நாளை) இருந்து ரெயில்கள் இயக்கப்பட உள்ளன. அதாவது நாளை டெல்லியில் இருந்து 15 ரெயில்கள் சிறப்பு ரெயில்களாக இயக்கப்படுகின்றன.
இந்த ரெயில்கள் சென்னை, பெங்களூரு, திருவனந்தபுரம், மும்பை சென்டிரல், ஆமதாபாத், செகந்திராபாத், திப்ருகர், அகர்தலா, ஹவுரா, பாட்னா, பிலாஸ்பூர், ராஞ்சி, புவனேசுவரம், மட்கோன், ஜம்முதாவி ஆகிய ஊர்களுக்கு புறப்பட்டு செல்லும். இந்த ரெயில்கள் அங்கு சென்றுவிட்டு மீண்டும் டெல்லிக்கு திரும்பி வரும்.
இந்த ரெயில்களில் பயணம் செய்ய ஐ.ஆர்.சி.டி.சி. இணையதள முகவரியில் மட்டுமே டிக்கெட் முன்பதிவு செய்யமுடியும். இதற்கான முன்பதிவு இன்று (திங்கட்கிழமை) மாலை 4 மணிக்கு தொடங்குகிறது.
ரெயில் நிலைய கவுண்ட்டர்களில் டிக்கெட் வழங்கப்பட மாட்டாது. அவை மூடப்பட்டு இருக்கும். மேலும் ரெயில் நிலையத்தில் பிளாட்பாரம் டிக்கெட்டும் வழங்கப்படாது.
டிக்கெட் வைத்திருக்கும் பயணிகள் மட்டுமே ரெயில் நிலையத்துக்குள் அனுமதிக்கப்படுவார்கள். பயணிகள் கட்டாயம் முக கவசம் அணிந்து இருக்க வேண்டும். ரெயில் நிலையத்தில் பரிசோதனை நடத்தப்படும். நோய்த்தொற்று இல்லாதவர்கள் மட்டுமே ரெயிலில் பயணம் செய்ய அனுமதிக்கப்படுவார்கள்.
ரெயில் புறப்படும் நேரம் உள்ளிட்ட விவரங்கள் பின்னர் அறிவிக்கப்படும் என கூறப்பட்டு உள்ளது. இந்திய ரெயில்வே மே 12 முதல் பயணிகள் ரயில் சேவையை படிப்படியாக தொடங்க திட்டமிட்டுள்ளது என்று ரயில்வே அமைச்சகத்தின் அதிகாரப்பூர்வ அறிக்கை தெரிவித்துள்ளது.
ரெயில்களின் பட்டியல்
மொத்தம் 15 சிறப்பு ரயில்கள் ( திரும்புவதைக் கருத்தில் கொண்டு-30)
புதுடெல்லி-திப்ருகர்
புதுடெல்லி-அகர்தலா
புதுடெல்லி-ஹவுரா
புதுடெல்லி-பாட்னா
புதுடெல்லி-பிலாஸ்பூர்
புதுடெல்லி-ராஞ்சி
புதுடெல்லி-புவனேஸ்வர்
புதுடெல்லி-செகந்திராபாத்
புதுடெல்லி-பெங்களூரு
புதுடெல்லி-சென்னை
புதுடெல்லி-திருவனந்தபுரம்
புதுடெல்லி-மட்கான்
புதுடெல்லி-மும்பை மத்திய
புதுடெல்லி-அகமதாபாத்
புதுடெல்லி-ஜம்மு தாவி
நாளை முதல் 50 சதவீத பயணிகளுடன் ரெயில்கள் இயங்க உள்ளதை தொடர்ந்து மத்திய அரசு வழிமுறைகளை அறிவித்தது!
சுகாதாரத்துறையின் ஆலோசனைகளை பின்பற்றி, ரெயில்களை இயக்கிட வேண்டும்;அறிகுறியற்ற உறுதி செய்யப்பட்ட இ-டிக்கெட் வைத்திருப்பவர்கள் மட்டுமே பயணம் செய்ய அனுமதிக்கப்படுவர்.
பயணிகள் கட்டாயம் ஸ்கிரீனிங் செய்யப்பட்டு, கிருமி நாசினி பயன்படுத்திய பின் அனுமதிக்கப்படுவர். முகக்கவசம் அணிந்து, சமூக இடைவெளியை பின்பற்றுவதை உறுதி செய்ய வேண்டும்.
Related Tags :
Next Story
"Daily Thanthi" a prestigious product from The Thanthi Trust
எங்களைப்பற்றி தனித்தன்மை பாதுகாப்பு தொடர்புகொள்ள வலைத்தள தொகுப்பு ஆலோசனைகள் வேலைவாய்ப்பு
Paper Ad Tariff Web Ad Tariff Terms & Conditions (E-paper)
காப்புரிமை 2024, © The Thanthi Trust Powered by Hocalwire