கேரள அரசியலில் புயலை கிளப்பும் வழக்கு: பொன்னை அடைய பெண்ணின் துணையோடு நடந்த சதி

திருவனந்தபுரம்,

கேரள அரசியலில் சர்ச்சையும், பரபரப்பும் ஒட்டிப்பிறந்த இரட்டை பிறவிகள் போல் எப்போதும் உடன் இருந்து கொண்டே இருக்கும். சரிதா நாயர் என்ற பெண்ணால் ஏற்பட்ட சர்ச்சை கடந்த காங்கிரஸ் ஆட்சியையே கவிழ்த்து விட்டது. அதுபோல் தற்போதும் ஒரு பெண்ணால் அந்த மாநில அரசு சர்ச்சை சுழலில் சிக்கி தவிக்கிறது.

அந்த பெண் பெயர் ஸ்வப்னா. கேரள அரசின் முக்கிய பதவியில் பணியாற்றிய அவர்தான் தற்போது கேரள மண்ணை ஆளும் அரசுக்கே பெரும் தலைவலியாக மாறி இருக்கிறார்.

அப்படி என்னதான் நடந்தது... சிக்கிய கடத்தல் தங்கம்

கேரள மாநிலம் திருவனந்தபுரம் மணக்காடில் ஐக்கிய அரபு அமீரக தூதரகம் உள்ளது. தூதரகத்துக்கு வெளிநாட்டில் இருந்து விமானத்தில் வரும் பொருட்களுக்கு சோதனையில் இருந்து விலக்கு உள்ளது. இது தூதரகத்துக்குரிய தனியுரிமை ஆகும். இதை சட்டவிரோதமாக பயன்படுத்தி அதிகாரிகள் துணையுடன், தூதரகத்தின் பெயரில் வெளிநாட்டில் இருந்து திருவனந்தபுரம் சர்வதேச விமான நிலையத்தில் சரக்கு விமானம் மூலம் தங்ககட்டிகள் கடத்தல் கடந்த ஆண்டு ஜூன் மாதம் முதல் ஓராண்டு காலமாக தொடர்ந்து நடந்துள்ளது.

இது குறித்து சுங்கத்துறை அதிகாரிகளுக்கு ரகசிய தகவல் கிடைத்தது. அதன் பேரில் திருவனந்தபுரம் விமான நிலையத்தில் சரக்கு விமானத்துக்கு தூதரகத்தின் பெயரில் வந்த பார்சல் ஒன்றை சுங்கத்துறை அதிகாரிகள், தூதரக அதிகாரிகள் முன்னிலையில் பிரித்து சோதனை செய்தனர். அப்போது அதற்குள் இருந்த 30 கிலோ தங்கக்கட்டிகளை பார்த்து அதிகாரிகள் திடுக்கிட்டனர். உடனே அவர்கள் அந்த 30 கிலோ தங்கத்தை பறிமுதல் செய்தனர்.

சூடுபிடித்த விவகாரம்

இதற்கிடையே விமான நிலையத்தில் சிக்கிய தங்ககட்டிகளை விடுவிக்குமாறு முதல் மந்திரி அலுவலகத்தில் இருந்து முக்கிய அதிகாரி ஒருவர் சுங்கத்துறை அதிகாரிகளுக்கு தொலைபேசியில் பேசியதாக தகவல்கள் வெளியானது. இதனால் இந்த விவகாரம் சூடு பிடிக்க தொடங்கியது. மேலும் தூதரகத்தின் பெயரில் தங்கம் கடத்தப்பட்டதால் உயர்மட்ட விசாரணை நடத்தப்பட்டது.

அதைத்தொடர்ந்து, தங்ககட்டிகள் கடத்தலில் தொடர்புடையதாக தூதரக முன்னாள் ஊழியர் சரித்குமார் கைது செய்யப்பட்டார். அவரிடம் நடத்திய விசாரணையில், தங்ககட்டிகள் கடத்தலில் சந்தீப்நாயர் என்பவர் மூளையாக செயல்பட்டதும், அவர், திருவனந்தபுரம் விமான நிலையத்தில் கடந்த 2014-ம் ஆண்டு 3 கிலோ தங்கம் பிடிபட்ட போது கே.டி.ரமீஸ் என்பவருடன் போலீசாரால் கைது செய்யப்பட்டதும் தெரிய வந்தது.

ஸ்வப்னாவுடன் பழக்கம்

அந்த வழக்கில் இருந்து வெளியே வந்த சந்தீப் நாயருக்கு, சரித்குமார் மற்றும் அவர் மூலம் கேரள அரசின் தகவல் தொழில்நுட்ப (ஐ.டி.) கட்டமைப்பு நிறுவனத்தில் பணியாற்றிய ஸ்வப்னாவுடன் பழக்கம் ஏற்பட்டது. அதை பயன்படுத்திக் கொண்டு தூதரகத்தின் பெயரில் சரக்கு விமானத்தில் பார்சல்களில் தங்ககட்டிகளை கடத்த திட்டமிட்டு செயல்படுத்தி உள்ளனர். தூதரகத்தின் பெயரில் வரும் பொருட்களுக்கு சோதனை இருக்காது என்பதால் தங்ககட்டிகளை கடத்துவதும் தொடர்ந்து நடைபெற்று வந்ததாக தெரிகிறது. ஆனால் திருவனந்தபுரம் விமான நிலையத்துக்கு சரக்கு விமானத்தில் தூதரக பெயரில் வந்த பார்சல்களை சுங்கத் துறை அதிகாரிகள் திடீரென்று சோதனை நடத்திய போது தங்ககட்டிகள் சிக்கின.

இதைத்தொடர்ந்து நடந்தப்பட்ட விசாரணையில், கடத்தல் புள்ளிகளுடன் அதிகாரி ஸ்வப்னாவுக்கு தொடர்பு இருந்தது வெளிச்சத்துக்கு வந்தது. இது அதிகாரிகளுக்கு அதிர்ச்சியை ஏற்படுத்தியது. இதையடுத்து அவரை கேரள அரசு பணியிடை நீக்கம் செய்தது. எங்கே சிக்கிவிடுவோமோ என்ற அச்சத்தில் ஸ்வப்னா குடும்பத்துடன் தலைமறைவானார். முன்னதாக அவர், தனது நெருங்கிய நண்பர் ஒருவரிடம் ரூ.15 லட்சம் அடங்கிய பையை கொடுத்து உள்ளார். அந்த நபர் மற்றும் பையில் இருந்த பல்வேறு ஆவணங்களும் கைப்பற்றப்பட்டது. அதுவும் விசாரணைக்கு மிகவும் உதவிகரமாக இருக்கும் என்று கூறப்படுகிறது.

முக்கிய அதிகாரி

மேலும் இந்த விவகாரத்தில் கேரள முதல்- மந்திரியின் முதன்மை செயலாளரும், ஐ.டி. துறை செயலாளருமான சிவசங்கரன் மீது சந்தேகம் எழுந்தது. இதனால் அவர், முதல் -மந்திரியின் முதன்மை செயலாளர் பொறுப்பில் இருந்து விடுவிக்கப்பட்டார். பின்னர் அவர், குடிமைப்பணி விதிகளை மீறியதாக கூறி பணியிடை நீக்கம் செய்யப்பட்டார்.

இதற்கிடையே தங்ககட்டிகள் கடத்தல் தொடர்பான மர்மங்கள், முக்கிய புள்ளிகளின் தொடர்புகளை கண்டறிய வேண்டும் என்பதற்காக தேசிய புலனாய்வு அமைப்பு (என்.ஐ.ஏ.) விசாரிக்க மத்திய உள்துறை அமைச்சகம் உத்தரவிட்டது. உடனே என்.ஐ.ஏ. அதிகாரிகள் தீவிர தேடுதல் வேட்டை நடத்தி, பெங்களூருவில் பதுங்கி இருந்த ஸ்வப்னாவை மடக்கி பிடித்து கைது செய்தனர். அப்போது அவருடைய கூட்டாளியான சந்தீப் நாயரும் கைது செய்யப்பட்டார். இந்த வழக்கில் இதுவரை மொத்தம் 15 பேர் கைது செய்யப்பட்டு உள்ளனர்.

இதில் 3-வது குற்றவாளியான துபாய் தொழில் அதிபர் பைசல் பரீத், துபாயில் போலீசாரால் கைது செய்யப்பட்டார். இவர் தான் ஒவ்வொரு முறையும் துபாயில் இருந்து தங்ககட்டி பார்சல்களை அனுப்பி உள்ளார். அதை திருவனந்தபுரம் விமான நிலையத்தில் சரித்குமார் டெலிவரி எடுத்துள்ளார்.

திடுக்கிடும் தகவல்கள்

அதற்கு முன்னோட்டமாக, கடந்த ஆண்டு ஜூன் மாதம் துபாயில் இருந்து போலி முத்திரையை பயன்படுத்தி ஒரு டம்மி பார்சலை அனுப்பி சோதனை செய்துள்ளனர். அது, தூதரகத்தில் பணியாற்றிய அதிகாரிகளின் துணையுடன் வெற்றிகரமாக டெலிவரி ஆனதால் தொடர்ந்து தங்கம் கடத்தலில் ஈடுபட்டுள்ளனர். அந்த வகையில் கடந்த ஓராண்டு காலமாக இதுவரை மொத்தம் 230 கிலோ தங்ககட்டிகள் கேரளாவுக்கு கடத்தி இருப்பதும், அவற்றை, கேரளா, தமிழகம் உள்பட 5 மாநிலங்களில் யார்? யார்? வாங்கினார்கள் என்றும் என்.ஐ.ஏ. அதிகாரிகள் தீவிரமாக விசாரித்து வருகிறார்கள். மேலும் துபாயில் கைதான பைசல்பரீத்தை இந்தியாவுக்கு கொண்டு வந்து விசாரித்தால் மேலும் பல திடுக்கிடும் தகவல்கள் வெளியாகும் என்று எதிர்பார்க்கப்படுகிறது.

இதற்கிடையே, தங்கம் கடத்தல் விவகாரம் குறித்து ஐக்கிய அரபு அமீரக அரசும் தூதரகத்தில் விசாரணை நடத்த உத்தரவிட்டுள்ளது. தூதரகத்தின் பெயரில் தங்கம் கடத்தல் தொடர்பாக கேரள முதல் -மந்திரி பினராயி விஜயன் மீது குற்றம் சாட்டி பிரதமர் மோடிக்கு கேரள மாநில காங்கிரஸ் தலைவர் ரமேஷ்சென்னிதலா கடிதம் எழுதினார். மேலும் முதல்-மந்திரி பதவி விலக வேண்டும், இந்த வழக்கை சி.பி.ஐ. விசாரிக்க வேண்டும் என்று எதிர்க்கட்சியினர் கோரிக்கை விடுத்து வருகின்றனர்.

மந்திரிக்கு தொடர்பா?

இந்த வழக்கில் கேரள மந்திரி ஒருவரின் தலையீடு இருப்பதை என்.ஐ.ஏ. அதிகாரிகள் கண்டுபிடித்து உள்ளனர். எனவே அவரை விசாரணை வளையத்துக்குள் கொண்டு வர நடவடிக்கை மேற்கொள்ளப்பட்டு வருகிறது. இதற்காக அந்த மந்திரியின் நடவடிக்கைகள் குறித்த தகவல்களை சேகரிக்கும் பணியில் வெளியுறவுத்துறை மற்றும் நிதி அமைச்சகம் ஆகியவை களத்தில் இறங்கி உள்ளன. தங்க கட்டிகள் கடத்தல் வழக்கில் ஒவ்வொரு நாளும் பகீர் தகவல்கள் வெளியாகி வருவது கேரள அரசியலில் பெரும் புயலை கிளப்பி உள்ளது.