கொரோனா பரவல் சங்கிலியை உடையுங்கள் மாநிலங்களுக்கு மத்திய அரசு அறிவுறுத்தல்

புதுடெல்லி,

இந்த நூற்றாண்டில் மனித குலம் சந்திக்கும் மிகப்பெரும் சவாலாக உருவாகி இருக்கிறது கொரோனா நோய்த்தொற்று. கொரோனாவை தவிர வேறு எதையும் சிந்திப்பதற்கு மனிதனை அது விடவில்லை. ஏழைகள் முதல் கோடீசுவரர்கள் வரை அனைத்து தரப்பினரையும் கபளீகரம் செய்ய காத்திருக்கும் கொரேனாவிடம் இருந்து தப்புவது குதிரைக்கொம்பாக மாறி இருக்கிறது.

கொரோனாவுக்கு எதிரான தடுப்பு மருந்துகளை உருவாக்கி இந்த சிக்கலில் இருந்து மக்களை விடுவிக்க அனைத்து நாடுகளும் முயற்சிகள் மேற்கொண்டு வருகின்றன. இதற்காக மருத்துவ ஆய்வகங்கள் இரவு-பகலாக பணியாற்றுகின்றன. ஆனாலும் இந்த பூனைக்கு இன்னும் யாரும் மணி கட்டவில்லை.

நாள்தோறும் லட்சக்கணக்கில் புதிய தொற்றுகளும், ஆயிரக்கணக்கில் புதிய மரணங்களும் ஏற்படும் சேதிகள்தான் உலக ஊடகங்களை ஆக்கிரமித்து வருகின்றன. கொரோனாவின் இத்தகைய மனித வேட்டைக்கு இந்தியாவும் தப்பவில்லை. இங்கும் புதிதாக தொற்றுக்கு ஆளாவோரின் எண்ணிக்கை தொடர்ந்து அதிகரிக்கிறது.

உலக அளவில் அமெரிக்கா மற்றும் பிரேசிலை தொடர்ந்து, தொற்று மற்றும் பலி எண்ணிக்கையில் இந்தியா 3-வது இடம் என்ற மோசமான சாதனையை தொடர்கிறது.

இந்நிலையில், ஆந்திரா, பஞ்சாப், கர்நாடகா மற்றும் தமிழகம் ஆகிய 4 மாநிலங்களில் அதிக தொற்று ஏற்பட்டு வரும் 15 மாவட்டங்களின் சுகாதார செயலாளர்களுடன் மத்திய சுகாதார செயலாளர் ராஜேஷ் பூஷண் காணொலி காட்சி மூலம் ஆலோசனை நடத்தினார்.

அப்போது கடுமையான கட்டுப்பாடுகள், சமூக விலகல் நடவடிக்கைகள், வீடு, வீடாக சோதனை உள்ளிட்ட நடவடிக்கைகள் மூலம் கொரோனா பரவல் சங்கிலியை உடைக்குமாறு பூஷண் கேட்டுக்கொண்டார். இந்த கூட்டத்தில் தமிழகத்தின் சென்னை, கோவை, சேலம் மற்றும் லக்னோ, கான்பூர் நகர், பல்லாரி, கொப்பல், பெங்களூரு நகர்ப்புறம் உள்ளிட்ட மாவட்ட சுகாதார அதிகாரிகள் கலந்து கொண்டனர்.