தென் ஆப்பிரிக்காவில் இருந்து பெங்களூரு வந்த 10 பேர் தலைமறைவு தேடும் பணி தீவிரம்

பெங்களூரு,

தென்ஆப்பிரிக்காவில் பரவ தொடங்கிய ஒமைக்ரான் வைரஸ் தற்போது 20-க்கும் மேற்பட்ட நாடுகளில் பரவியுள்ளது. இந்தியாவிலும் அந்த வைரஸ் நுழைந்துவிட்டது. அதாவது பெங்களூருவில் டாக்டர் உள்பட 2 பேருக்கு அந்த வைரஸ் பாதிப்பு கண்டறியப்பட்டு உள்ளது. இதற்கிடையே தென் ஆப்பிரிக்காவில் இருந்து பெங்களூருவுக்கு வந்த பலர் தலைமறைவாகியுள்ள அதிர்ச்சி தகவல் வெளியாகியுள்ளது.

அதாவது, தென்ஆப்பிரிக்காவில் இருந்து கடந்த 15 நாட்களில் 70-க்கும் மேற்பட்டவர்கள் பெங்களூருவுக்கு வந்துள்ளனர். அவர்களின் முகவரி, பெயர் உள்ளிட்ட விவரங்களை பெங்களூரு மாநகராட்சி அதிகாரிகள் சேகரித்துள்ளனர். அதன்படி அவர்களின் சளி மாதிரிகளை சேகரித்து பரிசோதனைக்கு அனுப்பி வைத்துள்ளனர்.

ஆனால் அவர்கள் கொடுத்த முகவரியில் போய் பார்த்தபோது அங்கு 10 பேர் மட்டும் இல்லை என்பது தெரியவந்தது. அவர்கள் தலைமறைவாகிவிட்டனர். இதனால் அதிகாரிகள் அதிர்ச்சி அடைந்துள்ளனர். அவர்கள் கொடுத்துள்ள செல்போன் எண்ணும் சுவிட்ச் ஆப் செய்யப்பட்டுள்ளது.

ஒமைக்ரான் வைரஸ் பரவியுள்ள நிலையில் தங்களுக்கும் பாதிப்பு இருக்குேமா என்ற அச்சத்தில் அவர்கள் தலைமறைவாக இருப்பதாக தெரிகிறது. இது மக்களிடையே அதிர்ச்சியை ஏற்படுத்தி உள்ளது. அவர்களை தேடும் பணி தீவிரப்படுத்தப்பட்டு உள்ளது.