உலகளாவிய படிதார் வர்த்தக உச்சி மாநாட்டை பிரதமர் மோடி இன்று தொடங்கி வைக்கிறார்..!

புதுடெல்லி,

குஜராத் மாநிலம் சூரத்தில் இன்று உலகளாவிய படிதார் வணிக உச்சி மாநாடு நடைபெற உள்ளது. இந்த மாநாட்டை பிரதமர் மோடி டெல்லியில் இருந்து இன்று மதியம் 12 மணியளவில் காணொலி காட்சி வாயிலாக தொடங்கி வைக்கிறார்.

இதுகுறித்து பிரதமர் அலுவலக வெளியிட்டுள்ள அறிக்கையில், 'படிதார் சமூகத்தின் சமூக - பொருளாதார மேம்பாட்டிற்கு உத்வேகம் அளிக்கும் வகையில் சர்தார்தம் அமைப்பால் 'மிஷன் 2026-ன்' கீழ் படிதார் வணிக உச்சி மாநாடு ஏற்பாடு செய்யப்பட்டுள்ளது. இந்த படிதார் உச்சி மாநாடு இரண்டு ஆண்டுகளுக்கு ஒருமுறை ஏற்பாடு செய்யப்படுகிறது. முதல் இரண்டு உச்சி மாநாடுகள் 2018 மற்றும் 2020-ம் ஆண்டுகளில் நடைபெற்றன.

இன்று சூரத்தில் 'ஆத்மநிர்பர் சமூகம் ஆத்மநிர்பர் குஜராத் மற்றும் இந்தியா' என்கிற முக்கிய கருப்பொருளின் கீழ் படிதார் வர்த்தக உச்சிமாநாடு நடைபெறுகிறது.

இந்த படிதார் உச்சி மாநாடு, சமூகத்திற்குள் சிறிய, நடுத்தர மற்றும் பெரிய நிறுவனங்களை ஒன்றிணைப்பதை நோக்கமாகக் கொண்டுள்ளது. புதிய தொழில்முனைவோரை வளர்த்து ஆதரிப்பது மற்றும் படித்த இளைஞர்களுக்கு பயிற்சி மற்றும் வேலைவாய்ப்பு உதவிகளை வழங்குதல் உள்ளிட்டவை இதில் அடங்கும்' என்று தெரிவிக்கப்பட்டுள்ளது.

இன்று முதல் மே 1-ம் தேதி வரை மூன்று நாள் நடைபெறவுள்ள இந்த படிதார் உச்சி மாநாடு, அரசாங்க தொழில் கொள்கை, எம்எஸ்எம்இ, புதிய தொழில் மற்றும் பிற கண்டுபிடிப்புகள் ஆகியவற்றின் பல்வேறு அம்சங்களை உள்ளடக்கியதாக இருக்கும்.