பேரறிவாளன் விடுதலை விவகாரத்தில் யாருக்கு அதிகாரம்..? மத்திய-மாநில அரசுகள் வாதம்

புதுடெல்லி, 

முன்னாள் பிரதமர் ராஜீவ்காந்தி கொலை வழக்கில் தண்டனை பெற்று ஜாமீனில் உள்ள பேரறிவாளன், தனது தண்டனையை நிறுத்தி வைத்து விடுவிக்கக்கோரி சுப்ரீம் கோர்ட்டில் மனு தாக்கல் செய்தார். இந்த மனுவை நீதிபதி எல்.நாகேஸ்வரராவ் தலைமையிலான அமர்வு விசாரித்து வருகிறது.

இந்த விவகாரத்தில் பேரறிவாளன் உள்ளிட்ட 7 பேரை விடுவிக்கும் சட்டசபையின் தீர்மானத்தை ஒருமனதாக முன்மொழிந்த அமைச்சரவையின் முடிவை அமல்படுத்தாமல் கவர்னர் தடுத்து வைத்திருப்பதுடன், இந்த விவகாரத்தை ஜனாதிபதிக்கு பரிந்துரைத்திருப்பது அரசியலமைப்பு சாசனத்தை மீறிய செயலாகும். இதுபோன்ற அதிகாரத்தை கவர்னருக்கு அரசியலமைப்பு சாசனம் 161-வது பிரிவு அளிக்கவில்லை’ என்றும் அந்த மனுவில் தெரிவிக்கப்பட்டிருந்தது. இதற்கிடையே இந்த வழக்கு மீதான விசாரணை கடந்த வாரம் நடைபெற்றது. 

தமிழக அமைச்சரவை ஒரு முடிவெடுத்து அதுபற்றி கவர்னர் முடிவெடுக்காமல் ஜனாதிபதிக்கு அனுப்பி வைக்க அவருக்கு அதிகாரம் இருக்கிறதா..? இல்லையா..? என்பதை முதலில் தெளிவுபடுத்துங்கள். மேற்கொண்டு வாதிட ஒன்றுமில்லை என மத்திய அரசு சொன்னால் பேரறிவாளனை உடனே விடுவித்து உத்தரவிடுகிறோம் என்று கூறி வழக்கினை இன்று நீதிபதிகள் ஒத்திவைத்தனர்.  

இந்நிலையில், இந்த வழக்கின் விசாரணை தொடர்ந்து நடைபெற்று வருகிறது. மத்திய அரசின் தரப்பில் கூடுதல் சொலிசிடர் ஜெனரல் கே எம் நட்ராஜ் ஆஜர் ஆகியுள்ளார்.

இந்த விவகாரத்தில் 2 அல்லது 3 ஆண்டுகள் கவர்னர் முடிவெடுக்கவில்லை.நாங்கள் முடிவெடுக்க முடிவுசெய்தபோது , ஜனாதிபதிக்கு அனுப்பியுள்ளார் என கூறப்பட்டது. அமைச்சரவை முடிவை ஜனாதிபதிக்கு கவர்னர் அனுப்ப அதிகாரம் உள்ளதா? என நீதிபதிகள் கேள்வி எழுப்பினர்.

பேரறிவாளன் விவகாரத்தில் விடுதலை தொடர்பான அதிகாரம் மத்திய அரசுக்கு மட்டுமே உள்ளதுஎன மத்திய அரசு வாதம் செய்து வருகிறது. 

தமிழக அரசு தனக்கு இருக்கும் அதிகாரத்தை பயன்படுத்தி பேரறிவாளன் உள்ளிட்டோரை விடுவிக்கும் முடிவை எடுத்து, அதுதொடர்பான தகவலை மத்திய அரசிடம் பகிர்ந்துகொண்டது. அதற்குப் பிறகுதான் மத்திய அரசு இந்த விவகாரத்தில் தனக்கு அதிகாரம் இருப்பதாக கூறி தலையிட்டது, அதன்பின்னரே அனைத்து குழப்பங்கள் தொடங்கின என தமிழக அரசு தரப்பில் தெரிவிக்கப்பட்டுள்ளது.

மேலும், கவர்னர் எந்த விதிகளின் அடிப்படையில் கோப்புகளை ஜனாதிபதிக்கு அனுப்பி வைத்தார்? கவர்னருக்காக நீங்கள் ஏன் வாதாடுகிறீர்கள்? என பேரறிவாளன் வழக்கில் மத்திய அரசின் வழக்கறிஞர்களுக்கு நீதிபதிகள் கேள்வி எழுப்பினர்.