செல்வ செழிப்பு பெற 6 வயது சிறுவனை கழுத்தறுத்து நரபலி கொடுத்த கட்டிட தொழிலாளிகள்

புதுடெல்லி,

புதுடெல்லியின் லோடி காலனி பகுதியில் சிறு குடிசைகள் அமைத்து கட்டிட தொழிலாளிகள் வசித்து வருகின்றனர். அந்த குடிசை பகுதியில் வசித்து வரும் 6 வயது சிறுவனின் பெற்றோரும் கட்டிட வேலை செய்து வருகின்றனர்.

இந்நிலையில், அந்த குடிசை பகுதியில் நேற்று இரவு 10.30 மணியளவில் சில பெண்கள் பூஜை நடத்தியுள்ளனர். அந்த பூஜையில் சிறுவன் கலந்து கொண்டுள்ளான். பூஜை நிகழ்ச்சி முடிந்ததும் பெண்கள் வெளியேறிய நிலையில் சிறுவன் மட்டும் வீடு திரும்பவில்லை.

இதனால், அதிர்ச்சியடைந்த சிறுவனின் பெற்றோர் குடிசை பகுதியில் சென்று பார்த்துள்ளனர். அங்கு தனது மகன் கழுத்து அறுக்கப்பட்டு, தலையில் படுகாயங்களுடன் ரத்த வெள்ளத்தில் பிணமாக கிடந்ததை கண்டு அதிர்ச்சியடைந்தனர்.

இது குறித்து போலீசாருக்கு தகவல் கொடுக்கப்பட்டது. தகவலறிந்து சம்பவ இடத்திற்கு விரைந்து சென்ற போலீசார், அதே குடியிருப்பு பகுதியில் தங்கி கட்டிட வேலை செய்துவந்த பீகாரை சேர்ந்த விஜய் குமார் மற்றும் அமீர் குமார் ஆகிய 2 பேரை பிடித்து விசாரித்தனர்.

விசாரணையில் சிறுவனின் தலையில் அடித்தும், கழுத்தறுத்தும் நரபலி கொடுத்ததை ஒப்புக்கொண்டனர். செல்வ செழிப்பு வேண்டுமென சிறுவனை நரபலி கொடுத்ததாக குற்றத்தை ஒப்புக்கொண்டனர். சிறுவனை குற்றவாளிகள் 2 பேரும் மதுபோதையில் கொலை செய்துள்ளனர். இதனை தொடர்ந்து 2 பேரையும் கைது செய்த போலீசார் விசாரணை நடத்தி வருகின்றனர்.