மதுவில் விஷம் கலந்து குடித்து வாலிபர் சாவு

சிக்கமகளூரு:

சித்ரதுர்கா மாவட்டம் ஒசதுர்கா தாலுகா தேவபுரா கிராமத்தைச் சேர்ந்தவர் பிரசன்னா (வயது 30) கூலி தொழிலாளி. இவருக்கு திருமணம் ஆகி மனைவி, குழந்தைகள் உள்ளன. இவர் மனைவி மற்றும் குழந்தைகளை பிரிந்து வாழ்ந்து வந்தார். இந்தநிலையில் பிரசன்னா திருட்டு வழக்கு ஒன்றில் கைது செய்யப்பட்டு சிறைக்கு சென்றார். பின்னர் வெளியே வந்த பிரசன்னா, அந்தப்பகுதியில் பிச்சை எடுத்து சாப்பிட்டு வந்தார்.

இந்தநிலையில் வாழ்க்கையில் விரக்தி அடைந்து காணப்பட்ட அவர், நேற்று முன்தினம் மதுபானத்தில் விஷத்தை கலந்து குடித்தார். பின்னர் மயங்கி கிடந்த அவரை அக்கம்பக்கத்தினர் மீட்டு அரசு ஆஸ்பத்திரியில் சேர்த்தனர். அங்கு தீவிர சிகிச்சை அளித்தும் பலனின்றி பிரசன்னா பரிதாபமாக உயிரிழந்தார். இதுகுறித்து ஒசதுர்கா போலீசார் வழக்குப்பதிவு செய்து விசாரணை நடத்தி வருகிறார்கள்.