'மேட்ரிமோனியல்' இணையதளம் மூலமாக 7 பெண்களை ஏமாற்றிய நபர் கைது..!

விசாகப்பட்டினம்,

மறுமணத்திற்காக 'மேட்ரிமோனியல்' இணையதளம் மூலமாக மாப்பிள்ளை தேடிய விவாகரத்து பெற்ற பணக்காரப் பெண்களை குறிவைத்து 7 பேரை ஏமாற்றிய ஆந்திரப்பிரதேசத்தைச் சேர்ந்த அடப்பா ஷிவ் சங்கர் பாபு (வயது 33) என்ற நபரை தெலங்கானா போலீசார் கைது செய்துள்ளனர்.

சங்கர் பாபு தெலங்கானா மற்றும் ஆந்திரப் பிரதேசம் என இரண்டு மாநிலங்களிலும் இதுவரை ஆறு பேரை திருமணம் செய்து, 50 லட்சம் ரூபாய் வரை மோசடி செய்துள்ளார். பாதிக்கப்பட்ட பெண் ஒருவர் அளித்த புகாரின் பேரில் சிவசங்கர் பாபுவை கச்சிபௌலி போலீசார் கைது செய்தனர். சிவசங்கர் பாபு தன்னிடம் இருந்து ரூ.30 லட்சம் பெற்றதாக அந்த பெண் புகாரில் தெரிவித்துள்ளார்.

முதற்கட்ட விசாரணையில், சிவசங்கர் பாபு 6 பெண்களை திருமணம் செய்து இதேபோல் ஏமாற்றியதை போலீசார் கண்டுபிடித்தனர். குற்றம் சாட்டப்பட்டவர்கள் விவாகரத்து செய்யப்பட்ட பெண்களை குறிவைத்து அந்த பெண்களை தொடர்பு கொண்டு அவர்களின் நம்பிக்கையை பெற்று ஏமாற்றியுள்ளனர்.

சிவசங்கர் பாபு மீது ஆர்சி புரம் மற்றும் கேபிஎச்பி காவல் நிலையங்களில் வழக்கு பதிவு செய்யப்பட்டுள்ளன. இதுவரை ஏழு பெண்களை ஏமாற்றி அவர்களிடமிருந்து 200 கிராம் தங்கம் பெற்றுள்ளார்.