சைபர் கிரைம்களைத் தடுக்க 'ட்ரூகாலர் செயலி' நிறுவனத்துடன் டெல்லி காவல்துறை ஒப்பந்தம்..!

புதுடெல்லி,

சைபர் கிரைம்களைத் தருக்கும் வகையில் 'ட்ரூகாலர் செயலி' நிறுவனத்துடன் டெல்லி காவல்துறை ஒப்பந்தம் செய்துள்ளது.

இது குறித்து டெல்லி காவல்துறை சிறப்பு ஆணையர் சஞ்சய் சிங் கூறியதாவது,

ட்ரூகாலர் செயலி ஒரு ஐடி சரிபார்ப்பு தளமாகும். தற்போது இணைய வழி மோசடிகள் அதிக அளவில் நடைபெறுகின்றன. அதிலும் செல்போன் மூலமாக இணைய வழி மோசடிகள் மிக அதிக அளவில் நடைபெறுகின்றன. அதனை கட்டுப்படுத்தும் விதமாக ட்ரூகாலர் செயலியுடன் டெல்லி காவல்துறை ஒப்பந்தம் செய்துள்ளது.

இந்த ஒப்பந்தத்தின் படி மோசடி அல்லது பிற பதிவு செய்யப்பட்ட சிக்கல்கள் தொடர்பாக புகார்களை பெற்ற டெல்லி காவல்துறையால் வழங்கப்பட்ட தொலைபேசி எண்களை இனி ட்ரூகாலர் செயலி காண்பிக்கும்.

எந்த வித புகாரிலும் சிக்காத உண்மையான அழைப்பாளர்களுக்கு பச்சை பேட்ஜ் மற்றும் நீல டிக் வழங்கப்பட்டு இவர்களுக்கு அரசாங்க பேட்ஜூம் வழங்கப்படும்.

மேலும், செல்போனில் மோசடி அழைப்புகள் வந்ததுமே எச்சரிக்கை அறிவிப்பு வரும் வகையில் ஒப்பந்தம் போடப்பட்டுள்ளது.