டெல்லி: ரோகினி பகுதியில் நிகழ்ச்சி அரங்கில் பயங்கர தீ விபத்து

புதுடெல்லி,

தலைநகர் டெல்லியில் இன்று திடீரென பயங்கர தீ விபத்து ஏற்பட்டது. டெல்லியில் உள்ள ரோகினி செக்டர் 3 பகுதியில் உள்ள விருந்து மண்டபம் ஒன்றில் தீ விபத்து ஏற்பட்டது. இதனால் அந்த பகுதியில் முழுவதும் புகை மண்டலமாக பரவியதால், மக்கள் அவதிக்குள்ளாகினர்.

விபத்து குறித்து 2.30 மணியளவில் தீயணைப்பு துறையினருக்கு தகவல் அளிக்கப்பட்டுள்ளது. இதனையடுத்து, 3 தீயணைப்பு வாகனங்கள் சம்பவ இடத்துக்கு விரைந்து சென்று தீயை அணைக்கும் பணியில் ஈடுபட்டனர். எனினும், தீ கட்டிடத்தின் அனைத்து பகுதிகளுக்கும் பரவியதால் 10-க்கும் மேற்பட்ட தீயணைப்பு வாகனங்கள் வரவழைக்கப்பட்டு தீயானது கட்டுக்குள் கொண்டு வரப்பட்டது.

இந்த தீ விபத்தில் இதுவரை உயிர்சேதம் எதுவும் ஏற்படவில்லை. தீ விபத்து ஏற்பட்டதற்கான காரணம் குறித்து விசாரணை நடத்தப்பட்டு வருகிறது.