கார் கவிழ்ந்த விபத்தில் 2 வயது ஆண் குழந்தை சாவு

ராமநகர்: ராமநகர் மாவட்டம் மாகடி தாலுகா நரசந்திரா கிராமத்தை சேர்ந்தவர் பரமேஸ். இவரது மனைவி ரம்யா. இந்த தம்பதிக்கு 2 வயதில் ஒரு ஆண் குழந்தை இருந்தது. இந்த நிலையில் பரமேஸ் தனது மனைவி குழந்தையுடன் துமகூரு மாவட்டம் குனிகல் தாலுகா எடியூரில் உள்ள சித்தலிங்கேஸ்வர் கோவிலுக்கு நேற்று காரில் சென்றார். சாமி தரிசனம் முடிந்ததும் பரமேஸ், மனைவி, குழந்தையுடன் ஊருக்கு புறப்பட்டார். காரை டிரைவர் ஓட்டி சென்றார்.

நாகேகவுடன பாளையா என்ற கிராம பகுதியில் சென்ற போது டிரைவரின் கட்டுப்பாட்டை இழந்த கார் தறிகெட்டு ஓடி சாலையில் கவிழ்ந்தது. இதில் 2 வயது குழந்தை சம்பவ இடத்திலேயே பரிதாபமாக இறந்தது. பரமேஷ், ரம்யா, கார் டிரைவர் படுகாயம் அடைந்தனர். விபத்து குறித்து அம்ருத்தூர் போலீசார் வழக்குப்பதிவு செய்து உள்ளனர்.