பெங்களூருவில் மர்ம உறுப்பில் கத்தியால் குத்தி பெண் கொடூர கொலை-கணவர் கைது

பெங்களூரு:-

12 ஆண்டுக்கு முன் திருமணம்

பெங்களூரு பசவேசுவராநகர் போலீஸ் எல்லைக்கு உட்பட்ட மஞ்சுநாத் நகர், 15-வது மெயின் ரோட்டில் வசித்து வருபவர் அய்யப்பா (வயது 35). இவரது மனைவி நாகரத்னா (32). இந்த தம்பதிக்கு ஒரு மகனும், ஒரு மகளும் உள்ளனர். சிட்டி மார்க்கெட்டில் கூலித் தொழிலாளியாக அய்யப்பா வேலை பார்த்து வருகிறார். ராஜாஜிநகரில் உள்ள ஒரு துணிக்கடையில் நாகரத்னா வேலை பார்த்து வந்தார்.

இந்த தம்பதி முதலில் ராஜாஜிநகர் அருகே சிவநகர் பகுதியில் தான் வசித்து வந்தனர். கடந்த 5 மாதங்களுக்கு முன்பாக தான் மஞ்சுநாத் நகரில் உள்ள வாடகைக்கு வீட்டில் குடியேறி இருந்தனர். அய்யப்பாவுக்கும், அவரது மனைவி நாகரத்னாவுக்கும் இடையே குடும்ப பிரச்சினை காரணமாக அடிக்கடி தகராறு ஏற்பட்டு வந்தது. நேற்று முன்தினம் அய்யப்பாவின் 2 பிள்ளைகளும், அவரது சகோதரி வீட்டுக்கு சென்றிருந்தனர்.

உறுப்பில் குத்தி கொடூர கொலை

இந்த நிலையில், நேற்று முன்தினம் இரவு அய்யப்பாவுக்கும், நாகரத்னாவுக்கும் இடையே தகராறு ஏற்பட்டது. அப்போது வீட்டில் படுத்திருந்த நாகரத்னாவின் தலையை அய்யப்பா தரையில் பலமுறை முட்டியதாக கூறப்படுகிறது. அதன்பிறகு, வீட்டில் கிடந்த கத்தியை எடுத்து மனைவி நாகரத்னாவின் மர்ம உறுப்பில் பல முறை குத்தியதாக தெரிகிறது. இதில், ரத்த வெள்ளத்தில் சம்பவ இடத்திலேயே நாகரத்னா துடி, துடித்து பரிதாபமாக உயிரிழந்தார்.

உடனே அங்கிருந்து அய்யப்பா வெளியே தப்பி சென்று விட்டார். சிறிது நேரத்திற்கு பிறகு உறவினர் ஒருவர் வீட்டுக்கு வந்த போது தான் நாகரத்னா கொலை செய்யப்பட்டு கிடப்பதை கண்டு அதிர்ச்சி அடைந்தார். இதுபற்றி அவர் உடனடியாக பசவேசுவராநகர் போலீசாருக்கு தகவல் தெரிவித்தார். அதன்பேரில் போலீசார் விரைந்து வந்து நாகரத்னாவின் உடலை கைப்பற்றி விசாரணை நடத்தினார்கள்.

கணவர் கைது

அப்போது நாகரத்னாவுக்கு வேறு ஒருவருடன் கள்ளத்தொடர்பு இருப்பதாக அய்யப்பா நினைத்துள்ளார். தனது மனைவியின் நடத்தையில் சந்தேகப்பட்டு அவர் அடிக்கடி சண்டை போட்டு வந்துள்ளார். அதன்படி நேற்று முன்தினம் நடந்த தகராறின் போது நாகரத்னாவை கத்தியால் கொடூரமாக குத்தி அய்யப்பா கொலை செய்தது தெரியவந்துள்ளது.

இதுகுறித்து பசவேசுவராநகர் போலீசார் வழக்குப்பதிவு செய்து அய்யப்பாவை கைது செய்துள்ளனர். அவரிடம் தொடர்ந்து விசாரணை நடத்தப்பட்டு வருகிறது. இந்த படுகொலை சம்பவம் அப்பகுதியில் பரபரப்பையும்,

அதிர்ச்சியையும் ஏற்படுத்தி உள்ளது.