1 லட்சம் மரக்கன்றுகள் நடப்பட்டுள்ளன

மயிலாடுதுறை மாவட்ட கலெக்டர் லலிதா வெளியிட்டுள்ள செய்தி குறிப்பில் கூறியிருப்பதாவது:- 75-வது சுதந்திரதின அமுதப் பெருவிழாவையொட்டி மயிலாடுதுறை மாவட்டத்தில் கடந்த 1 முதல் 15-ந்தேதி வரை 75 ஆயிரம் மரக்கன்றுகள் நட என நிர்ணயிக்கப்பட்டது. ஆனால் 15-ந்தேதி வரை மொத்தம் 1 லட்சம் மரக்கன்றுகள் நடப்பட்டுள்ளன. நிர்ணயிக்கப்பட்ட இலக்கைவிட கூடுதலாக மரக்கன்றுகள் நடப்பட்டுள்ளன. மரக்கன்றுகள் நடப்படுவதின் முக்கிய நோக்கம் மாவட்டத்தில் பசுமை புரட்சியை உருவாக்குவதாகும். பொது இடங்களில் உள்ள மரங்களை பாதுகாப்பதற்காக மாநில பசுமைக்குழு மற்றும் மாவட்ட பசுமைக்குழுக்கள் அமைக்கப்பட்டுள்ளன. முதல் -அமைச்சரின் வழிகாட்டுதலின்படி மயிலாடுதுறை மாவட்டத்தில் பசுமை மாவட்டமாக உருவாக்குவதற்காக சாலைகளின் இருபுறங்களிலும், பொது இடங்களிலும், ஆறுகள் மற்றும் குளங்களின் கரைகளிலும், பள்ளி வளாகங்களிலும், ஒவ்வொரு கிராமத்திலும் தொடர்ந்து மரக்கன்றுகள் நடும் பணி தொடர்ந்து நடைபெற்று வருகிறது. இவ்வாறு அதில் கூறப்பட்டுள்ளது.