வாடகை செலுத்தாத 10 கடைகளுக்கு 'சீல்'

வேலூர்

வேலூர் மாநகராட்சிக்கு சொந்தமான கடைக்கு மாதந்தோறும் வாடகை செலுத்தாதவர்களுக்கு நோட்டீஸ் வழங்கவும், அதிக வாடகை பாக்கி வைத்துள்ள கடைகளுக்கு 'சீல்' வைக்கவும் கமிஷனர் அசோக்குமார் உத்தரவிட்டுள்ளார்.

அதன்பேரில் மாநகராட்சி அதிகாரிகள் பல மாதங்கள் வாடகை செலுத்தாத கடைகளுக்கு நோட்டீஸ் வழங்கி சீல் வைத்து வருகின்றனர்.

மாநகராட்சி 2-வது மண்டலத்துக்கு உட்பட்ட நேதாஜி மார்க்கெட்டில் 30-க்கும் மேற்பட்ட கடைகள் சுமார் 6 மாதங்களாக வாடகை செலுத்தவில்லை. இதையடுத்து அந்த கடைகளுக்கு கடந்த சில நாட்களுக்கு முன்பு நோட்டீஸ் வழங்கப்பட்டது.

அதைத்தொடர்ந்து சிலர் வாடகை பாக்கியை செலுத்தினார்கள். ஆனாலும் சிலர் வாடகை பாக்கி வைத்திருந்தனர்.

இந்த நிலையில் உதவி கமிஷனர் பிரபுகுமார்ஜோசப் தலைமையில் உதவி வருவாய் அலுவலர் குமரவேலு மற்றும் ஊழியர்கள் இன்று நேதாஜி மார்க்கெட்டில் வாடகை செலுத்தாத 10 கடைகளுக்கு சீல் வைத்தனர்.

மாதந்தோறும் 5-ந் தேதிக்குள் வாடகை செலுத்த வேண்டும் என்று கடைக்காரர்களிடம் தெரிவித்தனர்.

நேதாஜி மார்க்கெட்டில் இதுவரை வாடகை செலுத்தாத 40 கடைகளுக்கு 'சீல்' வைக்கப்பட்டுள்ளது என்று மாநகராட்சி அதிகாரிகள் தெரிவித்தனர்.