ராமேசுவரத்தை சேர்ந்த 15 பேர் நடுக்கடலில் சிறைபிடிப்பு: இலங்கை கடற்படை தாக்குதலில் 2 மீனவர்கள் காயம்

ராமேசுவரம்,

ராமேசுவரத்தில் இருந்து கடந்த 5-ந்தேதி மீன்பிடிக்கச் சென்ற தங்கச்சிமடத்தைச் சேர்ந்த 2 விசைப்படகுகள் மற்றும் 15 மீனவர்களை எல்லை தாண்டி மீன்பிடித்ததாக கூறி இலங்கை கடற்படையினர் நடுக்கடலில் கைது செய்து, தலைமன்னார் கடற்படை முகாமுக்கு கொண்டு சென்றனர்.

அந்த 15 மீனவர்களும் நேற்று மன்னாரில் உள்ள கோர்ட்டில் ஆஜர்படுத்தப்பட்டனர். மீனவர்களை வருகிற 17-ந்தேதி வரை சிறையில் அடைக்க நீதிபதி உத்தரவிட்டார். எனவே வவுனியா சிறையில் அடைக்கப்பட்டனர்.

2 பேர் காயம்

இதனிடையே, 15 மீனவர்களில் குமரவடிவேல், வினோத் ஆகிய இருவரும் இலங்கை கடற்படையினர் நடத்திய தாக்குதலில் காயம் ஏற்பட்டதாக கூறப்பட்ட நிலையில், அவர்கள் இருவரும் மன்னார் அரசு ஆஸ்பத்திரிக்கு சிகிச்சைக்காக அழைத்துச்செல்லப்பட்டனர்.

சிகிச்சை முடிந்த பின்னர் அவர்களும் சிறையில் அடைக்கப்பட்டனர். கைது செய்யப்பட்ட 15 மீனவர்களில் ஒருவர் சிறுவன் என்பதால், காப்பகம் ஒன்றில் அவர் தங்க வைக்கப்பட்டு உள்ளதாக தகவல்கள் வெளியாகி உள்ளன.

விசைப்படகு மீனவர்கள் வேலைநிறுத்தம்

இதற்கிடையே இலங்கை சிறையில் உள்ள ராமேசுவரம் உள்ளிட்ட தமிழகம் மீனவர்களையும், அனைத்து படகுகளையும் விடுவிக்க மத்திய-மாநில அரசுகள் நடவடிக்கை எடுக்க வலியுறுத்தி ராமேசுவரத்தில் நேற்று விசைப்படகு மீனவர்கள் ஒரு நாள் வேலைநிறுத்தத்தில் ஈடுபட்டனர். இதனால் 600-க்கும் மேற்பட்ட விசைப்படகுகள் துறைமுக கடல் பகுதியில் நிறுத்தி வைக்கப்பட்டிருந்தன.

மேற்கண்ட கோரிக்கையை வலியுறுத்தி, தங்கச்சிமடம் வலசை பஸ் நிறுத்தம் எதிரே இன்று (செவ்வாய்க்கிழமை) காலை அனைத்து விசைப்படகு மீனவர்கள் சார்பாக கண்டன ஆர்ப்பாட்டம் நடைபெற உள்ளதாகவும் அறிவிக்கப்பட்டுள்ளது.