பறவைகளை திருடிய 2 சிறுவர்கள் கைது

தூத்துக்குடி தாளமுத்துநகர் பகுதியை சேர்ந்தவர் செல்வமணி (வயது 33). இவர் கே.வி.கே.நகர் பகுதியில் லவ் பேர்ட்ஸ் பறவைகள் விற்பனை கடை நடத்தி வருகிறார். சம்பவத்தன்று இரவு வழக்கம் போல் கடையை பூட்டிவிட்டு சென்றாராம். நேற்று முன்தினம் காலையில் கடையை திறக்க வந்த போது, கடையில் பூட்டு உடைக்கப்பட்டு கிடந்தது. இதனால் அதிர்ச்சி அடைந்த செல்வமணி கடைக்குள் சென்று பார்த்து உள்ளார். அங்கு இருந்த ரூ.35 ஆயிரம் மதிப்புள்ள லவ்பேர்ட்ஸ் உள்ளிட்ட பறவைகளை யாரோ மர்ம நபர் திருடி சென்று இருப்பது தெரியவந்தது.

இது குறித்த புகாரின் பேரில் தாளமுத்துநகர் போலீசார் வழக்கு பதிவு செய்து விசாரணை நடத்தினர். விசாரணையில், 2 சிறுவர்கள் பறவைகளை திருடி சென்றது தெரியவந்தது. உடனடியாக போலீசார் அந்த சிறுவர்களை கைது செய்தனர். அவர்களிடம் இருந்து ரூ.12 ஆயிரம் மதிப்புள்ள பறவைகளையும் போலீசார் மீட்டனர்.