ஆட்டோவில் பேட்டரி திருடிய 2 பேர் கைது

தூத்துக்குடி 3-வது மைல் பகுதியைச் சேர்ந்தவர் பூல்பாண்டி. இவருடைய மகன் சுடலைமுத்து (வயது 38). ஆட்டோ டிரைவர். சம்பவத்தன்று இவர் தனது ஆட்டோவை இந்திய உணவுக்கழக குடோன் அருகே உள்ள டைமண்ட் காலனி ரோட்டில் நிறுத்தி விட்டு சென்றார். மறுநாள் காலையில் பார்த்தபோது, ஆட்டோவில் இருந்த பேட்டரியை யாரோ மர்மநபர் திருடி இருப்பது தெரிய வந்தது.

இதுகுறித்த புகாரின்பேரில், சிப்காட் போலீசார் வழக்குப்பதிவு செய்து விசாரணை நடத்தினர். விசாரணையில், தூத்துக்குடி சிவந்தாகுளத்தை சேர்ந்த கிருஷ்ணகுமார் மகன் சபரிஸ்குமார் (28), தூத்துக்குடி அண்ணாநகரை சேர்ந்த குமாரசாமி மகன் சரவணன் (23) ஆகிய 2 பேரும் சேர்ந்து ஆட்டோவில் இருந்த பேட்டரியை திருடியது தெரியவந்தது.

உடனடியாக போலீசார் சபரிஸ்குமார், சரவணன் ஆகிய 2 பேரையும் கைது செய்தனர். அவர்களிடம் இருந்து ரூ.8 ஆயிரம் மதிப்புள்ள பேட்டரி மற்றும் திருடுவதற்கு பயன்படுத்திய மோட்டார் சைக்கிளையும் பறிமுதல் செய்தனர்.