தனியார் கல்லூரி பஸ் மோதி 2 பேர் பலி

கீழக்கரை,

ராமநாதபுரம் மாவட்டம் சத்திரக்குடி அருகே உள்ள மல்லல் ஊரை சேர்ந்தவர்கள் மனோஜ் (வயது 25), பாலா (25). இவர்கள் இருவரும் இரவு சத்திரக்குடியில் இருந்து ஏர்வாடி நோக்கி மோட்டார்சைக்கிளில் சென்று கொண்டிருந்தனர்.

ஏர்வாடி அருகே கிழக்கு கடற்கரை சாலையில் பாலம் வேலை நடந்து கொண்டிருந்த இடத்தில் சென்றபோது எதிரே வந்த தனியார் கல்லூரி பஸ் எதிர்பாராதவிதமாக அவர்கள் சென்ற மோட்டார்சைக்கிள் மீது மோதியது. இதில் தூக்கி வீசப்பட்ட இருவரும் பலத்த காயம் அடைந்து சம்பவ இடத்திலேயே பரிதாபமாக இறந்தனர். விபத்து குறித்து அறிந்த ஏர்வாடி போலீசார் அங்கு சென்று இறந்தவர்களின் உடல்களை பிரேத பரிசோதனைக்காக ராமநாதபுரம் அரசு ஆஸ்பத்திரிக்கு அனுப்பி வைத்தனர். விபத்து தொடர்பாக போலீசார் வழக்குப்பதிவு செய்து விசாரணை நடத்தி வருகின்றனர்.