வெவ்வேறு விபத்துகளில் 2 பேர் பலி

சிவகாசி,

சிவகாசியில் வெவ்வேறு விபத்துகளில் 2 பேர் பலியாகினர்.

முதியவர் பலி

ஸ்ரீவில்லிபுத்தூர் கோட்டைப்பட்டியை சேர்ந்தவர் கோட்டமலையான் (வயது 54). இவர் சுக்கிரவார்பட்டியில் உள்ள ஒரு பேப்பர் மில்லில் வேலை செய்து வந்தார். இவர் மில்லின் அருகில் சைக்கிளில் சென்ற போது அந்த வழியாக வந்த மோட்டார் சைக்கிள் கோட்ட மலையான் மீது மோதியதாக கூறப்படுகிறது. இதில் அவருக்கு தலையில் காயம் ஏற்பட்டது.

உடனே அருகில் இருந்தவர்கள் அவரை மீட்டு திருத்தங்கலில் உள்ள ஒரு தனியார் ஆஸ்பத்திரியில் சேர்த்து முதலுதவி அளித்து பின்னர் மதுரை பெரிய ஆஸ்பத்திரியில் சிகிச்சைக்காக சேர்த்தனர். அங்கு அவர் பரிதாபமாக இறந்தார். இந்த விபத்து குறித்து திருத்தங்கல் போலீசார் விசாரணை நடத்தி வருகின்றனர்.

மற்றொரு சம்பவம்

அதேபோல சிவகாசி ஓடை தெருவை சேர்ந்தவர் வீரய்யா (67). இவர் ஆப் செட் மிஷின் இடைத்தரகராக வேலை செய்து வந்தார்.

இந்தநிலையில் சம்பவத்தன்று வீரய்யா தனது மோட்டார் சைக்கிளில் விருதுநகர் ரோட்டில் வந்து கொண்டிருந்தார். அப்போது அந்த வழியாக சென்ற அரசு பஸ் இவர் மீது மோதிவிட்டு நிற்காமல் சென்றதாக கூறப்படுகிறது.

உடனே அங்கிருந்தவர்கள் அவரை மீட்டு சிவகாசி அரசு ஆஸ்பத்திரிக்கு அழைத்து சென்றனர். அங்கு அவரை பரிசோதனை செய்த டாக்டர், வீரய்யா ஏற்கனவே இறந்து விட்டதாக தெரிவித்துள்ளார். இந்த விபத்து குறித்து சிவகாசி டவுன் போலீசார் வழக்குபதிவு செய்து விசாரணை நடத்தி வருகின்றனர்.