இளம்பெண் உள்பட 2 பேர் பலி

கடையநல்லூர்:

கடையநல்லூர் அருகே பஸ்-மோட்டார் சைக்கிள் மோதிக் கொண்ட விபத்தில் இளம்பெண் உள்பட 2 பேர் பரிதாபமாக இறந்தனர்.

இதுகுறித்து போலீஸ்தரப்பில் கூறப்பட்டதாவது:-

பஸ்-மோட்டார்சைக்கிள் மோதல்

தென்காசி மங்கம்மா சாலை பகுதியைச் சேர்ந்தவர் கருப்பையா மகன் அய்யப்பன் (வயது 19). இவர் தீபாவளி அன்று அதிகாலையில் மோட்டார் சைக்கிளில் கடையநல்லூருக்கு சென்றுவிட்டு, ஊருக்கு திரும்பி வந்து கொண்டு இருந்தார். அப்போது, மோட்டார் சைக்கிள் பின்னால் இளம்பெண் அமர்ந்து வந்ததாக கூறப்படுகிறது.

கடையநல்லூர் அருகே அச்சம்பட்டி பகுதியில் மதுரை-தென்காசி தேசிய நெடுஞ்சாலையில் சென்றபோது, அந்த வழியாக கொல்லத்திற்கு சென்ற அரசு பஸ் எதிர்பாராதவிதமாக மோட்டார் சைக்கிள் மீது மோதியது.

2 பேர் சாவு

இதில் தூக்கி வீசப்பட்ட அய்யப்பன், மோட்டார் சைக்கிளில் பின்னால் இருந்த இளம்பெண் ஆகியோர் சம்பவ இடத்திலேயே பரிதாபமாக இறந்தனர்.

இதுகுறித்து தகவல் அறிந்த கடையநல்லூர் போலீசார் சம்பவ இடத்திற்கு விரைந்து சென்றனர். பலியான 2 பேரின் உடல்களை கைப்பற்றி பிரேத பரிசோதனைக்காக கடையநல்லூர் அரசு ஆஸ்பத்திரிக்கு அனுப்பி வைத்தனர்.

தொடர்ந்து விபத்தில் இறந்த பெண் குறித்து விசாரணை நடத்தினார்கள். அதில் அந்த பெண் கடையநல்லூர் அருகே உள்ள மங்களாபுரத்தைச் சேர்ந்த விக்னேஷ் மனைவி அகிலா (19) என்பது தெரியவந்தது.

டிரைவர் கைது

இந்த விபத்து தொடர்பாக, அரசு பஸ் டிரைவரான ராஜபாளையம் சேத்தூரை சேர்ந்த லாரன்ஸ் சேவியர் ராஜாவை போலீசார் கைது செய்து விசாரணை நடத்தி வருகிறார்கள்.