வங்கி உதவி மேலாளர் உள்பட 2 பேர் பலி

வங்கி உதவி மேலாளர்

திருச்சி மாவட்டம், துறையூர் பகுதியை சேர்ந்தவர் முகமது அர்ஷத். இவர் வாணியம்பாடியில் உள்ள ஒரு வங்கியில் உதவி மேலாளராக பணிபுரிந்து வந்தார். இவரது நண்பர் ஆரீப்அகமது. இவர்கள் நேற்று காலை மோட்டார் சைக்கிளில் பெங்களூரு - சென்னை தேசிய நெடுஞ்சாலையில் சென்று கொண்டிருந்தனர்.

நெக்குந்தி பகுதியில் சென்றபோது திடீரென எதிர் திசையில் வளையம்பட்டு பகுதியை சேர்ந்த அஜித்குமார் என்பவர் வந்த மோட்டார் சைக்கிளும் இவர்களது மோட்டார்சைக்கிளும் நேருக்கு நேர் மோதிக்கொண்டன. இந்த விபத்தில் 3 பேரும் படுகாயம் அடைந்தனர்.

உடனடியாக அங்கிருந்த போலீசார் மற்றும் பொதுமக்கள் இவர்கள் 3 பேரையும் மீட்டு ஆம்புலன்ஸ் மூலம் மருத்துவமனைக்கு அனுப்பி வைத்தனர்.

சாவு

இதில் வாணியம்பாடி அரசு மருத்துவமனையில் சிகிச்சை பலனின்றி முகமது அர்ஷத் (27) உயிரிழந்தார். ஆரீப் அகமது (வயது 19), மற்றொரு மோட்டார் சைக்கிளை ஓட்டி வந்த அஜித்குமார் (28) ஆகியோர் மேல் சிசிச்சைக்காக வேலூர் மருத்துவக்கல்லூரி மருத்துவமனையில் அனுப்பப்பட்டனர். அங்கு சிகிச்சை பலனின்றி அஜித் குமார் இறந்து விட்டார். ஆரீப் அகமது தொடர்ந்து சிகிச்சை பெற்று வருகிறார்.

இந்த விபத்து குறித்து வாணியம்பாடி தாலுகா போலீசார் வழக்குப்பதிவு செய்து விசாரணை மேற்கொண்டு வருகின்றனர்.