மரத்தில் கார் மோதி 2 பெண்கள் பலி

வேப்பனப்பள்ளி:

வேப்பனப்பள்ளி அருகே மரத்தில் கார் மோதி 2 பெண்கள் பலியாகினர். மேலும் டிரைவர் உள்பட 6 பேர் படுகாயம் அடைந்தனர்.

மரத்தில் கார் மோதியது

கிருஷ்ணகிரி மாவட்டம் வேப்பனப்பள்ளி அருகே உள்ள ஐப்பிகானப்பள்ளி கிராமத்தில் இருந்து கான்கிரீட் பணிக்காக 8 தொழிலாளர்களை ஏற்றிக்கொண்டு ஒரு கார் சென்று கொண்டிருந்தது. இந்த காரை சரவணன் (வயது26) என்பவர் ஓட்டி சென்றார். சின்னகொத்தூர் அருகே சென்றபோது கார் நிலை தடுமாறி சாலையோரம் இருந்த மரத்தின் மீது மோதியது.

இந்த விபத்தில் ஐப்பிகானப்பள்ளி கிராமத்தை சேர்ந்த முருகேசன் மனைவி மங்கம்மாள் (40) என்பவர் சம்பவ இடத்திலேயே பரிதாபமாக உயிரிழந்தார். மேலும் இடிபாடுகளில் சிக்கி டிரைவர் சரவணன், தொழிலாளர்கள் முருகம்மாள், அம்மாசியம்மாள், முனிலட்சுமி, வெங்கடம்மாள், குமார் உள்ளிட்ட 7 பேர் படுகாயம் அடைந்தனர்.

மேலும் ஒரு பெண் சாவு

இவர்களின் அலறல் சத்தம் கேட்டு அக்கம் பக்கத்தினர் ஓடி வந்து 7 பேரையும் மீட்டு ஆம்புலன்ஸ் மூலம் கிருஷ்ணகிரி அரசு மருத்துவமனைக்கு அனுப்பி வைத்தனர். அங்கு அவர்களுக்கு தீவிர சிகிச்சை அளிக்கப்பட்டு வருகிறது. இந்த விபத்து குறித்து வேப்பனப்பள்ளி போலீசாருக்கு தகவல் தெரிவிக்கப்பட்டது.

அதன் பேரில் போலீசார் விரைந்து சென்று இறந்த மங்கம்மாவின் உடலை கைப்பற்றி பிரேத பரிசோதனைக்காக கிருஷ்ணகிரி மருத்துவமனைக்கு அனுப்பி வைத்தனர். இந்த விபத்து குறித்து போலீசார் வழக்குப்பதிவு செய்து விசாரணை நடத்தி வருகின்றனர்.

இந்தநிலையில் மருத்துவமனையில் சிகிச்சை பெற்று வந்த முனிலட்சுமி(42) என்பவர் சிகிச்சை பலனின்றி நேற்று இரவு இறந்தார்.