20 கோழிகள் விஷம் வைத்து சாகடிப்பு

தட்டார்மடம்:

தட்டார்மடம் அருகே உள்ள எள்ளுவிளை கீழத்தெருவை சேர்ந்தவர் கலைச்செல்வி (வயது 36). இவர் கோழி வளர்த்து வருகிறார். நேற்று முன்தினம் காலை இவர் கோழிகளை இரை தின்பதற்காக கூண்டில் இருந்து வெளியே திறந்து விட்டிருந்தார். மாலையில் கோழிகள் திரும்பி வரவில்லை. இதையடுத்து கலைச்செல்வி தேடியபோது, வீட்டின் பின்பக்கம் 20 கோழிகள் இறந்து கிடந்தது தெரியவந்தது. இதனால் அவர் அதிர்ச்சி அடைந்தார்.

யாரோ விஷம் வைத்து கோழிகளை கொன்று இருக்கலாம் என்று கூறப்படுகிறது. இதுகுறித்து கலைச்செல்வி கொடுத்த புகாரின் பேரில், தட்டார்மடம் போலீஸ் சப்-இன்ஸ்பெக்டர் நெல்சன் வழக்குப்பதிவு செய்து விசாரணை நடத்தி வருகிறார்.