அ.தி.மு.க. இயக்கத்தை அழிக்க இதுவரை யாரும் பிறக்கவில்லை தம்பிதுரை எம்.பி. பேட்டி

கரூர், 

கரூரில் எம்.ஜி.ஆர். நூற்றாண்டு விழாவையொட்டி அமைக்கப்பட்டிருந்த புகைப்பட கண்காட்சியை பாராளுமன்ற துணை சபாநாயகர் தம்பிதுரை காலை திறந்து வைத்தார். பின்னர் அவர் நிருபர்களிடம் கூறியதாவது:- கரூரில் எம்.ஜி.ஆர். நூற்றாண்டு  விழா சிறப்பாக கொண்டாடப்பட்டு வருகிறது. இந்த ஆட்சி நிலையானது. இன்னும் 4 ஆண்டுகள் மட்டுமல்லாமல் ஜெயலலிதா கூறியது போன்று நூறாண்டுகள் தமிழகத்தை ஆட்சி செய்யும். இது மக்களால் ஏற்றுக்கொள்ளப்பட்ட ஒன்று. அ.தி.மு.க. எனும் இந்த இயக்கத்தை அழிக்க இதுவரை யாரும் பிறக்கவில்லை.

மறைந்த முதல்வர் ஜெயலலிதா இந்த ஆட்சியை நமக்கு தந்துவிட்டு சென்றிருக்கிறார். ஜெயலலித வழியில் எடப்பாடி பழனிசாமி செயல்பட்டு வருகிறார். ஆனால் இந்த ஆட்சியை கலைக்க முடியவில்லையே. கவிழ்க்க முடியவில்லையே என்ற விரக்தியில் எதிர்க்கட்சியினர் ஒவ்வொருவரும் ஒவ்வொரு விதமாக பேசிக்கொண்டு இருக்கிறார்கள். அது நடக்காது. நாங்கள் நல்லதையே நினைக்கிறோம், நல்லதே நடக்கும். இவ்வாறு அவர் கூறினார். இதையடுத்து சசிகலா பரோலில் வந்தால் அ.தி.மு.க.வை ஒருங்கிணைப்பது தொடர்பாக அவருடன் பேசுவீர்களா? என்ற கேள்விக்கு தம்பிதுரை எம்.பி. பதில் எதுவும் கூறாமல் சென்று விட்டார்.