சென்னையில் 5-ந் தேதி ஜெயலலிதா நினைவு நாள் அமைதி பேரணி ஓ.பன்னீர்செல்வம்-எடப்பாடி பழனிசாமி ஆலோசனை

சென்னை,

அ.தி.மு.க. பொதுச்செயலாளராகவும், தமிழக முதல்- அமைச்சராகவும் இருந்த ஜெயலலிதா கடந்த 2016-ம் ஆண்டு டிசம்பர் 5-ந்தேதி காலமானார். அவரது உடல் மெரினா கடற்கரை எம்.ஜி.ஆர். நினைவிடம் அருகே அடக்கம் செய்யப்பட்டது. தற்போது அங்கு ஜெயலலிதாவுக்கு நினைவிடம் அமைக்கும் பணி வேகமாக நடந்து வருகிறது. இந்த பணி இறுதி கட்டத்தை எட்டியுள்ளது.

இந்த நிலையில் ஜெயலலிதாவின் 2-ம் ஆண்டு நினைவு தினம் 5-ந்தேதி அனுஷ்டிக்கப்படுகிறது. இதையொட்டி அ.தி.மு.க. சார்பில், அண்ணா சாலை-அண்ணா சிலை அருகில் இருந்து நினைவு அமைதி பேரணி நடத்த திட்டமிடப்பட்டுள்ளது. இந்த அமைதி பேரணி சம்பந்தமாக விவாதிப்பதற்காக அ.தி.மு.க. தலைமை அலுவலகத்தில் நேற்று மாலை ஆலோசனை கூட்டத்திற்கு ஏற்பாடு செய்யப்பட்டு இருந்தது.

இந்த கூட்டத்திற்கு அ.தி.மு.க. ஒருங்கிணைப்பாளரும், துணை முதல்-அமைச்சருமான ஓ.பன்னீர்செல்வம், அ.தி.மு.க. இணை ஒருங்கிணைப்பாளரும், முதல்- அமைச்சருமான எடப்பாடி பழனிசாமி ஆகியோர் தலைமை தாங்கினர். இந்த கூட்டத்தில் சென்னை, காஞ்சீபுரம், திருவள்ளூர் மாவட்ட செயலாளர்கள் மற்றும் அமைச்சர்கள் கலந்து கொண்டனர்.

கூட்டத்தில், ஜெயலலிதா 2-ம் ஆண்டு நினைவு நாள் அமைதி பேரணியை நடத்துவது குறித்து விரிவாக ஆலோசிக்கப்பட்டது. ஜெயலலிதாவுக்கு அஞ்சலி செலுத்தும் நிகழ்ச்சியிலும், மெரினா கடற்கரையில் நடக்கும் உறுதி மொழி ஏற்பு நிகழ்ச்சியிலும் அ.தி.மு.க. எம்.எல்.ஏ.க்கள், எம்.பி.க்கள், நிர்வாகிகள் கட்டாயம் கலந்து கொள்ள வேண்டும் என்றும் அறிவுறுத்தப்பட்டது.