திருவாரூரில் 303 வாக்குச்சாவடி மையங்கள் - தமிழக தலைமை தேர்தல் அதிகாரி சத்யபிரதா சாகு

சென்னை,

திருவாரூர் சட்டமன்ற தொகுதி உறுப்பினராக இருந்த தி.மு.க. தலைவர் கருணாநிதி மறைவைத் தொடர்ந்து அந்த தொகுதி காலி இடமாக அறிவிக்கப் பட்டது. இந்த நிலையில் திருவாரூர் தொகுதிக்கான இடைத்தேர்தல் வருகிற 28-ந் தேதி நடைபெறும் என தேர்தல் ஆணையம் நேற்று முன்தினம் அறிவித்தது.இந்த அறிவிப்பினை தொடர்ந்து தேர்தல் நடத்தை விதிமுறைகள் உடனடியாக அமலுக்கு வந்தது. 

அதன்படி இடைத்தேர்தலுக்கான வேட்பு மனு தாக்கல்  03-ம் தேதி நாளை (வியாழக்கிழமை) தொடங்குகிறது. வேட்பு மனு தாக்கல் செய்ய கடைசி நாள் 10-ந் தேதி. வேட்பு மனு வாபஸ் பெற 14-ந் தேதி கடைசி நாள் என அறிவிக்கப்பட்டுள்ளது. இதனை தொடர்ந்து 28-ந் தேதி வாக்குப்பதிவும், 31-ந் தேதி வாக்கு எண்ணிக்கை நடைபெற்று முடிவுகளும் அறிவிக்கப்பட உள்ளது.

இந்நிலையில்,  தமிழக தலைமை தேர்தல் அதிகாரி சத்யபிரதா சாகு செய்தியாளர்களிடம் கூறியதாவது:

இடைத்தேர்தலையொட்டி திருவாரூரில் 303 வாக்குச்சாவடி மையங்கள் அமைக்கப்பட உள்ளது, அனைத்து வாக்குசாவடிகளிலும் வாக்குப்பதிவு எந்திரம் பயன்படுத்தப்படும். யாருக்கு வாக்களித்தோம் என்பதை அறியும் வசதியுடைய வாக்குப்பதிவு எந்திரங்கள் பயன்படுத்தப்படும். திருவாரூரில் மொத்த வாக்காளர்களின் எண்ணிக்கை 2,58,687, ஆண்கள் - 1,27,500 பேர், பெண்கள் -1,31,169 பேர், 3-ம் பாலினத்தவர் - 18 பேர் என சத்யபிரதா சாகு கூறினார்.