போராட்டங்களை தூண்டி ஆட்சியை கவிழ்க்க சதி மு.க.ஸ்டாலின் மீது எடப்பாடி பழனிசாமி கடும் தாக்கு

ஏழைகள், விவசாயிகளுக்கு பொங்கல் போனஸ்

எடப்பாடி பழனிசாமி அறிவிப்பு 

முதல்-அமைச்சர் எடப்பாடி பழனிசாமி விழாவில் மேலும் பேசும்போது, ஏழை மக்களும் பொங்கலை சிறப்பாக கொண்டாட வேண்டும் என்பதற்காக தான் பொங்கல் பரிசாக ரூ.1,000 வழங்கப்பட்டது. இதுவரை எந்த ஆட்சியிலும், எந்த மாநிலங்களிலும் இதுபோன்று வழங்கியது கிடையாது. எதிர்க்கட்சி தலைவர் மு.க.ஸ்டாலின், அவருடைய கட்சியை சேர்ந்த வக்கீலை தூண்டிவிட்டு உயர்நீதிமன்றத்தில் வழக்குபோட்டு, தடையாணை வாங்க முயற்சி செய்தார். ஆனால், மக்கள் தான் எஜமானர்கள். மக்கள் தான் நீதிபதிகள். ஆகவே, நீதிமன்றத்தில் நீதி வென்றது. நீதிமன்ற உத்தரவின் அடிப்படையில் அனைத்து ஏழை மக்களுக்கும் பொங்கல் பரிசு வழங்கி, எல்லா இல்லங்களிலும் பொங்கல் பொங்குகின்ற காட்சியை பார்க்க முடிந்தது.

பல்வேறு தொழிற்சாலைகளில் பணிபுரிகின்றவர்களுக்கும், அரசு ஊழியர்களுக்கும் பொங்கல் போனஸ் மற்றும் தீபாவளி பண்டிகை போனஸ் கொடுக்கின்றார்கள். அதைப்போல நம் முடைய ஏழை மக்களுக்கு ஏன் கொடுக்கக்கூடாது?. அதற்கு எந்த தடை வந்தாலும் இந்த அரசு உடைத்தெறிந்து அவர்களுக்கு கொடுக்கும். ஏனென்றால், அவர்கள் உழைத்தால் தான் மற்றவர்கள் சிறப்பாக வாழமுடியும். அவர்கள் வேர்வையாக சிந்துகிற ரத்தம் இந்த நாட்டின் வளர்ச்சிக்காக சிந்துகின்ற வேர்வை என்பதை எண்ணி பார்க்க வேண்டும். ஆகவே, அந்த ஏழைகளுக்கு எம்.ஜி.ஆரும், ஜெயலலிதாவும் வாரிவாரி கொடுத்தார்கள். அந்த வழியிலே இந்த அரசும் வாரிவாரி வழங்கும் என்று தெரிவித்துக்கொள்கிறேன். எதிர்காலத்தில் விவசாயிகளுக்கும், ஏழை தொழிலாளர்களுக்கும் பொங்கல் போனஸ் வழங்கும் திட்டம் விரைவில் கொண்டுவரப்படும் என்று கூறினார்.